Vendet e Bashkimit Evropian nuk arritën të bien dakord për një grup të ri sanksionesh kundër Moskës të mërkurën, thanë katër burime diplomatike për Reuters. Kufizimet thuhet se do jenë në fuqi për përvjetorin e nisjes së sulmit të Rusisë ndaj Ukrainës.
Më shumë bisedime midis përfaqësuesve të vendeve anëtare të BE-së priten të enjten pasdite, pohuan burimet.
Të hënën, BE-ja zgjati edhe për një vit një sërë sanksionesh ndaj Rusisë, të vendosura për konfliktin në Ukrainë. Presidenti i Këshillit Evropian Charles Michel pranoi më herët se debatet mbi ndëshkimet e reja që synojnë Rusinë janë bërë më sfiduese pasi blloku tashmë ka vendosur pothuajse çdo sanksion të madh të mundshëm ndaj vendit dhe nuk ka ‘shumë gjëra’ për të bërë.
Paketa e dhjetë e propozuar e sanksioneve të BE-së ndaj Rusisë thuhet se do jetë 11 miliardë euro (11.7 miliardë dollarë) dhe do përqendrohet në ndalimin e shitjeve të mallrave të teknologjisë së lartë që mund të përdoren në sistemet e armëve.
Lista e zezë e eksportit thuhet se do përfshijë elektronikën, lazerin, pajisje radio, programet, avionikët, kamerat detare dhe mineralet e rralla të tokës, si dhe përbërës të tjerë më specifikë të përdorur në nanoteknologji.
Brukseli deri më tani ka miratuar nëntë paketa sanksionesh ndaj Rusisë, duke synuar shumë sektorë të ekonomisë, si dhe biznesmenë, politikanë dhe gazetarë.
