Komiteti i Mbikëqyrjes së Kongresit kërkoi të mërkurën që Pentagoni, Departamenti i Shtetit dhe Agjencia Amerikane për Zhvillim Ndërkombëtar të provojnë se ndihma ushtarake dhe ekonomike prej 113 miliardë dollarësh e akorduar për Ukrainën nuk po humbet në ‘shpërdorim, mashtrim e abuzim’.
Në një letër drejtuar Sekretarit të Mbrojtjes Lloyd Austin, Sekretarit të Shtetit Antony Blinken dhe administratores së USAID-it, Samantha Poëer, Kryetari i Komitetit të Mbikëqyrjes James Comer u kërkoi tre zyrtarëve të dorëzonin të gjitha dokumentet dhe komunikimet në lidhje me çdo program të ndihmës ekonomike dhe ushtarake për qeverinë ukrainase.
Komiteti i Comer po kërkon gjithashtu prova dokumentare të planeve të administratës Biden për të lidhur dërgesat e ndihmave me nismat kundër korrupsionit, dhe dokumente që japin hollësi se si administrata vlerëson suksesin e përpjekjes së saj të ndihmës.
Letra u jep afat zyrtarëve të Bidenit deri më 8 mars për të siguruar të gjitha provat, që datojnë që nga fillimi i sulmit të Rusisë në Ukrainë shkurtin e kaluar.
“Ofrimi i sigurisë dhe ndihmës humanitare për qëllime luftarake dhe rindërtimi vjen me një rrezik të natyrshëm mashtrimi, shpërdorimi dhe abuzimi,” shkroi Comer.
“Shtetet e Bashkuara duhet të identifikojnë këto rreziqe dhe të zhvillojnë mekanizma mbikëqyrës për t’i zbutur ato.”
Ndërsa zëdhënësi i Këshillit të Sigurisë Kombëtare, John Kirby, pretendoi në janar se administrata ‘nuk ka parë asnjë shenjë’ se ndihma ushtarake ose ekonomike ‘kanë rënë pre e çdo lloj korrupsioni në Ukrainë’, një mori raportesh nga vendi sugjerojnë të kundërtën.
Presidenti ukrainas Vladimir Zelensky shkarkoi një numër zyrtarësh të lartë muajin e kaluar me dyshimet për përfitim nga ndihma e huaj, ndërsa raportet e vitit të kaluar – të mbështetura nga Amnesty International – sugjeruan se vetëm 30% e armëve perëndimore të dërguara në Ukrainë po kalonin në të vërtetë në linjat e frontit.
Zyrtarët amerikanë dhe kanadezë pranuan në atë kohë se nuk e kishin idenë se ku përfundonin shumica e këtyre armëve, me një burim të inteligjencës amerikane i tha CNN se ato zhduken ‘në një vrimë të madhe të zezë’ sapo hyjnë në Ukrainë.
Republikanët në Kongres kanë mbështetur gjerësisht politikën e Presidentit Joe Biden për të armatosur Ukrainën, megjithëse përpara se partia e tij të rimarrë kontrollin e Dhomës së Përfaqësuesve nëntorin e kaluar, kryetari i Dhomës së Përfaqësuesve Kevin McCarthy paralajmëroi se GOP nuk do nënshkruante më ‘një çek të bardhë’ për Kievin.
