Kryeministri Rama ka vlerësuar arsimin në vend duke sjellë si shembull përgatitjen e mjekëve dhe invermierëve shqiptarë që janë larguar nga vendi dhe janë punësuar shumë shpejt në vendet evropiane ku kanë emigruar.
Sipas kreut të qeverisë ky fakt mjafton për t’i vënë vulën e cilësisë sistemit arsimor.
“E dimë se nga vijmë dhe se ku duhet të shkojmë, ndaj jemi të detyruar që të ecim para, sa i përket vendimmarrësve dhe politikbërjes, për furnizimin e këtij kapitali njerëzor. Ky kapital ka nevojë për investim, arsimimin, pagë dinjitoze. Nëse marrim arsimimin, mund të themi se kemi ecur në mënyrë pozitive para. Sot kemi një sistem arsimimi të bluzave të bardha, që e ka marrë vulën e cilësisë nga fakti se të arsimuarit në vendin tonë mirëpriten dhe në vendet e zhvilluara. Sot jemi para një problemi që duhet ta adresojmë në mënyrë të ndershme.” – tha Rama.
Ai shtoi më tej se studentët në Shqipëri paguajnë vetëm 1/16-ën e kostos së vërtetë të studimit.
Ai e bëri deklaratën gjatë Kongresit të Shëndetësisë ku theksoi se duhen marrë masa për të adresuar largimin e mjekëve dhe infermierëve që diplomohen në Shqipëri në vende të tjerë, duke përmendur Gjermaninë.
“Arsyeja se pse shtetet investojnë për të bërë sa më të lehtë procesin e studimeve, është për të garantuar shëndetin e popullit të tyre. Në kushtet e sotme rezulton e pamundur që shteti shqiptar, taksapaguesi, mundësitë e të cilit nuk janë të pakufizuar, dhe shërbimet nuk vihen në diskutim, të paguajnë 15 nga 16 pjesë të financimit të studimit të një mjeku. Pra, sot studenti i mjekësisë paguan 1/16 e kostos reale. Këtë shteti e bën duke marrë në konsideratë një sërë faktorësh që s’ka nevojë t’i rendis. Shteti nuk e bën dhe taksapaguesi shqiptar nuk paguajnë për këtë, që ditën kur mbarojnë studimet dhe marrin diplomën e mjekut, ata që financohen nga ky buxhet dhe kjo sakrificë, të ikin të shërbejnë në Gjermani. Shteti shqiptar nuk financon studimet për sistemin shëndetësor gjerman. Ky është problem që shumë vende e kanë adresuar dhe ka ardhur koha që dhe ne ta adresojmë. Nuk mjafton që të kryesh një shkollë dhe të kesh përmbushur detyrimet e tua në aspektin teorik, por duhet dhe aspekti praktik.” – tha Rama.
