Faktorët që përfshijnë krizat ekonomike, ndryshimet klimatike dhe pasojat nga pandemia Covid-19 kanë çuar në rrethana ideale që kolera të lulëzojë në vendet me rrezik të lartë, ka paralajmëruar Organizata Botërore e Shëndetësisë (OBSH), pasi ka vërejtur një rritje të mprehtë të sëmundjes në të paktën 30 vende.
Shkalla e shpërthimeve të ndryshme u rrit ndjeshëm në vitin 2022 pas disa vitesh rënie, tha OBSH. Midis janarit dhe tetorit të vitit të kaluar, 29 vende raportuan raste të sëmundjes, krahasuar me 23 një vit më pare, me shifrat që do rriten në vitin 2023.
“Numrin e vendeve me këto shpërthime të mëdha që ndodhin në të njëjtën kohë, nuk e kemi parë për të paktën 20 vjet”, tha për The Telegraph Philippe Barboza, kreu i njësisë së reagimit ndaj emergjencave të OBSH-së ndaj kolerës.
“Shumica e shpërthimeve të mëdha që po shikojmë janë të nxitura nga ngjarje të mëdha dhe të pazakonta klimatike,” shtoi ai, duke shtuar se vendet e Afrikës Jugore janë veçanërisht në rrezik pasi përballen me një vit të tretë radhazi të shiut të dendur dhe cikloneve.
Drejtori i OBSH-së, Tedros Adhanom Ghebreyesus, tha vitin e kaluar se efektet e ndryshimeve klimatike kishin shtuar ndikimin e kolerës.
Siria shpalli shpërthimin e saj të parë të sëmundjes në 15 vjet vitin e kaluar, me gjendjen që u përkeqësua pas tërmeteve të muajit të kaluar. Libani po përballet me një problem të ngjashëm për herë të parë në 30 vjet pasi lufton për të luftuar sëmundjen mes kolapsit ekonomik.
Ekspertët thonë se problemi është përkeqësuar edhe nga shërbimet shëndetësore të vendeve të ndryshme që janë mbingarkuar nga rastet e Covid-19, duke qenë se përpjekjet për të luftuar shpërthimet e kolerës u ndërprenë gjatë gjithë pandemisë.
“Kolera mund të kontrollohet, duhet të kontrollohet,” shpjegoi Barboza.
Kolera është një sëmundje e rëndë që merret duke gëlltitur ushqim ose ujë të ndotur. Mund të çojë në vdekje brenda disa orësh nëse nuk trajtohet. Shifrat nga OBSH thonë se rreth 143,000 vdesin nga sëmundja globalisht çdo vit.
