Prokurorët gjermanë kanë gjetur ‘gjurmë’ provash që tregojnë se ukrainasit mund të kenë qenë të përfshirë në shpërthimet që nxorrën jashtë funksionit tubacionet e gazit Nord Stream në shtator 2022, sipas raporteve të mediave gjermane të martën.
Hetuesit identifikuan një jaht që ishte përdorur potencialisht për transportimin e një ekuipazhi prej gjashtë personash, pajisje zhytjeje dhe eksploziv në Detin Baltik në fillim të shtatorit. Lënda plaëse u vendos më pas mbi tubacionet, sipas një hetimi të përbashkët nga transmetuesit publikë gjermanë ARD dhe SËR si dhe gazeta Die Zeit.
Raportet gjermane thanë se jahti ishte marrë me qira nga një kompani me bazë në Poloni që është ‘me sa duket në pronësi të dy ukrainasve’.
Megjithatë, asnjë provë e qartë nuk është krijuar deri më tani se kush e urdhëroi sulmin, thanë raportet.
Në reagimin e saj të parë, qeveria e Ukrainës hodhi poshtë raportimet.
Mykhailo Podolyak, një këshilltar i presidentit ukrainas Volodymyr Zelenskyy, mohoi se qeveria ukrainase kishte ndonjë përfshirje në sulmet e gazsjellësit.
“Megjithëse më pëlqen të mbledh teori konspirative zbavitëse për qeverinë ukrainase, më duhet të them: Ukraina nuk ka të bëjë fare me fatkeqësinë e Detit Baltik dhe nuk ka informacion për ‘grupet e sabotimit pro-ukrainas’”, shkroi Podolyak në një postim në Twitter.
Tre nga katër tubacionet që përbëjnë tubacionet e gazit nënujor Nord Stream 1 dhe 2 nga Rusia në Gjermani u shkatërruan nga shpërthimet shtatorin e kaluar. Gjermania, Suedia dhe Danimarka nisën hetimet për një incident që u vërtetua shpejt se ishte një rast ‘sabotimi’.
Raportet e medias gjermane – të cilat vijnë në krye të një raporti të New York Times të martën, i cili thoshte se ‘inteligjenca sugjeron se një grup pro-ukrainas’ sabotoi tubacionet – theksojnë se nuk ka asnjë provë që autoritetet ukrainase të kenë urdhëruar sulmin ose të jenë përfshirë në të.
Çdo përfshirje e mundshme e Kievit në sulm do rrezikonte tensionimin e marrëdhënieve midis Ukrainës dhe Gjermanisë, e cila është një nga furnizuesit më të rëndësishëm të ndihmës civile dhe ushtarake për vendin, ndërsa Kievi zyrtar lufton kundër pushtimit të Rusisë.
Sipas hetimit nga prokurorët publikë gjermanë që citohen nga mediat gjermane, ekipi që vendosi ngarkesat shpërthyese në tubacione përbëhej nga pesë burra – një kapiten, dy zhytës dhe dy asistentë zhytjeje – si dhe një grua mjeke, të gjithë me kombësi të panjohur dhe që vepronin me pasaporta false. Ata u larguan nga porti gjerman i Rostock më 6 shtator me jahtin e marrë me qira, thuhet në raport.
Ai shtoi se jahti më vonë iu kthye pronarit ‘në gjendje të papastër’ dhe se ‘në tavolinë në kabinë, hetuesit ishin në gjendje të zbulonin gjurmët e eksplozivit’.
Por raportet thanë gjithashtu se hetuesit nuk mund të përjashtojnë që lidhja e mundshme me Ukrainën ishte pjesë e një operacioni që synonte të fajësonte Kievin për sulmet.
I kontaktuar nga POLITICO, një zëdhënës i qeverisë gjermane iu referua hetimeve në vazhdim nga zyra e prokurorit të përgjithshëm gjerman, e cila nuk pranoi të komentojë.
Zëdhënësi i qeverisë tha gjithashtu: “Disa ditë më parë, Suedia, Danimarka dhe Gjermania informuan Këshillin e Sigurimit të Kombeve të Bashkuara se hetimet ishin në vazhdim dhe se ende nuk kishte asnjë rezultat”.
Zëdhënësja e Ministrisë së Jashtme ruse, Maria Zakharova hodhi poshtë raportet për përfshirjen e Ukrainës në bombardimet e Nord Stream, duke thënë në një postim në faqen e mediave sociale Telegram se ato synonin të largonin vëmendjen nga raportet e mëparshme, se SHBA-ja shkatërroi tubacionet.
VINI RE: Ky material është pronësi intelektuale e Politico
