Presidenti i SHBA Joe Biden ka sugjeruar që Kongresit mund t’i duhet të miratojë një ligj federal që mbron të drejtat transgjinore për të parandaluar kufizimet si ato të vendosura së fundmi në Florida, të cilat ai i quajti ‘mizore’.
“Mënyra se si e bëjmë këtë është që të sigurohemi që të miratojmë legjislacionin siç miratuam për martesat e të njëjtit seks,” tha Biden të hënën në një video duke parë intervistën e tij me ‘The Daily Show’.
Biden nuk specifikoi se cilat mbrojtje ai beson se qeveria federale duhet të miratojë, megjithëse ai ka thënë në të kaluarën se amerikanët transgjinorë duhet të kenë ‘çdo të drejtë, duke përfshirë përdorimin e banjës së identitetit gjinor në publik’. Kufizimi i të drejtave të tilla është ligjërisht dhe moralisht i gabuar, tha ai vjeshtën e kaluar.
Presidenti veçoi kufizimet e vendosura në Florida, ku guvernatori Ron DeSantis ka mbrojtur një ndalim të operacioneve të ndryshimit të seksit dhe bllokuesve të pubertetit për fëmijët. DeSantis, një kryesues për nominimin presidencial të Partisë Republikane në vitin 2024, mbrojti gjithashtu një ndalim të djemve biologjikë që të konkurrojnë në sportet e vajzave.
“Ajo që po ndodh në Florida është, siç do të thoshte nëna ime, ‘afër të bërit mëkat’. Dua të them, është thjesht e tmerrshme ajo që ata po bëjnë. Nuk është sikur, një fëmijë zgjohet një mëngjes dhe thotë: ‘E dini, vendosa që dua të bëhem burrë ose dua të bëhem grua. Dua të them, për çfarë po mendojnë këtu? Ata janë qenie njerëzore, duan, kanë ndjenja, kanë prirje…Është mizore.” – tha Biden.
Kongresi, në atë kohë i kontrolluar nga demokratët, miratoi legjislacionin dhjetorin e kaluar që legalizon martesat e të njëjtit seks.
Martesa e të njëjtit seks ishte tashmë e ligjshme në mbarë vendin, duke pasqyruar një vendim të Gjykatës së Lartë të SHBA të qershorit 2015 që hoqi të gjitha ndalimet dhe kufizimet shtetërore për bashkime të tilla. Martesa ndërracore ka qenë e ligjshme në mbarë vendin dhe e mbrojtur me kushtetutë që nga viti 1967.
Një sondazh i Reuters/Ipsos i publikuar muajin e kaluar tregoi se votuesit amerikanë preferojnë DeSantis ndaj Biden me një diferencë prej 41%-38% në zgjedhjet presidenciale të vitit 2024.
Megjithatë, guvernatori i Floridës së pari do të duhet të fitojë nominimin e partisë së tij. Në një garë kokë më kokë me ish-presidentin Donald Trump, DeSantis do fitonte me një diferencë prej 45%-41%, sipas një sondazhi të Yahoo News/YouGov.
