Ndërsa po zhvillon vizitën e tij 3 ditore në vendin tonë, sot Sekretari i Selisë së Shenjtë për Marrëdhëniet me Shtetet dhe Organizatat Ndërkombëtare, Arqipeshkvi Paul Richard Gallagher u prit nga presidenti i republikës Bajram Begaj.
Presidenti Begaj përshëndeti vizitën e Imzot Gallagher në Shqipëri dhe e konsideroi atë një konfirmim të mardhënieve të mira me shtetin e Vatikanit, duke vënë në pah edhe marrëdhëniet shpirtërore midis komunitetit katolik shqiptar dhe Selisë së Shenjtë.
Presidenti Begaj u ndal në mënyrë të veçantë në rolin dhe kontributin e jashtëzakonshëm që ka luajtur dhe luan Selia e Shenjtë për paqen dhe stabilitetin e rajonit të Ballkanit Perëndimor. Në këtë kontekst, Presidenti Begaj ritheksoi kërkesën për njohjen nga ana e Shtetit të Vatikanit të Shtetit të Kosovës, njohje që do të shërbente si një mbështetje shumë e madhe për shtetin më të ri në Evropë.
Presidenti Begaj nënvizoi nevojën e shtimit të mbështetjes nga të gjithë aktorët e rëndësishëm, për Kosovën dhe qytetarët e saj, si dhe të dialogut mes Kosovës dhe Serbisë të lehtësuar nga Bashkimi Evropian dhe mbështetur nga Shtetet e Bashkuara të Amerikës.
Të dy bashkëbiseduesit u ndalën dhe tek ndikimi në rajonin e Ballkanit Perëndimor i agresionit ushtarak rus në Ukrainë dhe ndërgjegjësimin për rëndësinë që ky rajon ka për stabilitetin e kontinentit Evropian, por jo vetëm.
