Mbedhja me Kryesinë e PD e Enkelejd Alibeajt ditën e sotme ka përfunduar.
Mësohet se në fokus të diskutimeve kanë qenë kandidaturat për zgjedhjet e 14 majit.
Në mbledhje deputetët kanë folur se si duhet të veprojnë për zgjedhjet e 14 majit dhe për bashkimin e demokratëve, ndërkaq në mbledhje, mësohet se janë propozuar dy emra nga PD zyrtare për kryetar për Bashkinë e Tiranës, Jonila Godole dhe Roland Bejko.
Ndërsa deputetja Dhurata Çupi propozoi daljen me lista për këshillat bashkiakë, por jo me kandidatë për kryetarë të bashkive.
“Së pari ne duhet të mbajmë strukturat unike dhe fakti që kemi mendim po thuaj gjysmë për gjysmë kemi rrezikun që të ndahemi edhe një herë e mund të zvogëlohemi përsëri. Kjo është përgjegjësi direkt e juaja Enkelejd dhe Gazi. Ju duhet të jeni përbashkues.
Së dyti kam refuzuar sulmet e foltores si të shitur e të blerë dhe sot refuzoj akuzat këtu që ne që kemi mendim ndryshe të konsiderohemi që shohim interesat tona. Këtë e refuzoj edhe këtu. Më dhemb PD dhe do bëj çmos të rritet PD dhe të bashkohet sa të mundet.
Ne kemi optimizmin të dalim me listën e këshillave bashkiakë dinjitozë dhe figura dinjitoze dhe të votohemi shumë më shumë se partitë e tjera.
Ndërkohë nuk duhet të dalim me kandidatura për kryetar bashkie. Dhe këtë e kam për të mirën e PD dhe të bashkimit.” tha deputetja Dhurata Çupi:
Ndërkohë Jorida Tabaku tha se nuk kemi asnjë arsye dhe asnjë justifikim të jemi ne ato që përçajnë votën e opozitës.
“Kam ndarë të njëjtin qëndrim që kisha në shtator, opozita duhet të dalë me kandidatë unikë! Nuk duhet në asnjë mënyrë që ne të bëjmë betejë kundër nesh, ne kemi një kundërshtar, kemi qeverinë dhe asnjë arsye dhe asnjë justifikim të jemi ne ato që përçajnë votën e opozitës!
Ne duhet të mbrojmë logon e PD, duhet të nxjerrim Partinë Demokratike si alternativë në këto zgjedhje! Unë nuk e bëj dot që të kërkoj votën kundër kolegëve të mi! Unë nuk kam asnjë dyshim që ne për të fituar duhet të jemi bashkë, duhet të jemi dhe më shumë se kaq!” u shpreh Jorida Tabaku.
