Koreja e Veriut ka ndarë hollësi për dy nga testet e saj të fundit të armëve, të cilat përfshijnë sulme të simuluara bërthamore. Seuli gjithashtu raportoi se Koreja e Veriut lëshoi disa raketa balistike në det, vetëm disa orë përpara se një anije luftarake amerikane të mbërrinte në Korenë e Jugut.
Pheniani tha se kreu teste në ‘anijen e re të sulmit nënujor pa pilot’ midis 25 dhe 27 marsit, duke deklaruar se ‘njësia luftarake testuese’ ishte ‘shpërthyer me saktësi nën ujë’.
E quajtur më parë një armë sekrete, ushtria e Koresë së Veriut ka pohuar se platforma mund të krijojë një ‘cunam radioaktiv’ duke përdorur shpërthime nënujore dhe ‘të asgjësojë grupet e anijeve të armikut’ pa u zbuluar, megjithëse ka zbuluar pak hollësi rreth dronëve nënujorë.
Arma mbeti e zhytur për më shumë se 41 orë dhe u shpërthye në ujërat në brigjet lindore të Koresë së Veriut, njoftoi të martën Agjencia Qendrore e Lajmeve Koreane (KCNA).
Në një stërvitje tjetër të fundit, raketat balistike taktike u ngarkuan me municione ‘simuluese të kokave bërthamore’ për të provuar ‘përgatitjet’ e ushtrisë, e ndjekur nga një ‘sulm virtual bërthamor’ në të cilin kokat e provës shpërthyen 500 metra mbi objektivin e tyre. Komandanti i njësisë lëshuese tha se stërvitja pohoi se ‘nëse luftojmë, me siguri do ta asgjësojmë armikun’, sipas KCNA.
Testet e fundit vijnë në mes të tensioneve në rritje midis Phenianit, Uashingtonit dhe Seulit, me SHBA-në që ka udhëhequr një sërë stërvitjesh të mëdha ushtarake në rajon në muajt e fundit, të cilat Koreja e Veriut i ka dënuar vazhdimisht si përgatitje për sulm.
