Ish-presidenti Donald Trump është paditur si pjesë e hetimit shumëvjeçar të Prokurorit të Distriktit të Manhatanit, ndoshta për pagesa të parave mënyrë të fshehtë. Prokurori i Qarkut të Manhatanit, Alvin Bragg, ka hetuar Trumpin për pagesa të parave të heshtura të bëra përpara zgjedhjeve presidenciale të 2016-ës.
Këto përfshijnë pagesën prej 130,000 dollarësh për aktoren e filmave pornografikë, Stormy Daniels, dhe pagesën prej 150,000 dollarësh për ish-modelen e Playboy, Karen McDougal, shkruan Fox News.
Pagesat e parave të heshtura të bëra për McDougal dhe Daniels u zbuluan dhe u raportuan nga Fox News në 2018. Këto pagesa ishin hetuar nga Zyra e Prokurorit të SHBA-së në Distriktin Jugor të Nju Jorkut dhe nga Komisioni Federal i Zgjedhjeve.
Prokurorët federalë në Distriktin Jugor të Nju Jorkut nuk e akuzuan Trumpin në lidhje me pagesën e Stormy Daniels në vitin 2019, edhe pse Cohen e implikoi atë si pjesë e marrëveshjes së tij për pranimin e fajësisë. Komisioni Federal i Zgjedhjeve gjithashtu pushoi hetimin e tij për këtë çështje në 2021.
“Këtë mbrëmje ne kontaktuam avokatin e zotit Trump për të bashkërenduar dorëzimin e tij në zyrën e Prokurorit të Manhattanit për akuzën mbi një aktakuzë të Gjykatës së Lartë, e cila mbetet e vulosur,” tha një zëdhënës i Zyrës së Prokurorit të Qarkut të Manhattan në një deklaratë të enjten.
“Udhëzimet do të jepen kur të zgjidhet data e gjykimit.”
Trump reagoi ndaj aktakuzës së tij, duke e sulmuar Bragg-un për ‘fiksimin’ e tij në përpjekjen për të ‘rrëzuar Trump’, ndërsa paralajmëroi se masa për të akuzuar një ish-president të Shteteve të Bashkuara do ‘dështojë’.
“Ky është Persekutim Politik dhe Ndërhyrje Zgjedhore në nivelin më të lartë në histori”, tha Trump në një deklaratë.
“Që nga koha kur zbrita nga shkallët lëvizëse në Kullën Trump dhe madje edhe para se të betohesha si Presidenti juaj i Shteteve të Bashkuara, Demokratët e Majtë Radikalë, që janë armiku i burrave dhe grave punëtorë të këtij vendi, kanë qenë duke u angazhuar në një gjueti shtrigash për të shkatërruar lëvizjen tonë ‘Bëjeni Amerikën të Madhe Përsëri’.
Demokratët kanë gënjyer, mashtruar dhe vjedhur në obsesionin e tyre për të ‘rrëzuar Trumpin’, por tani ata kanë bërë të pamendueshmen, duke paditur një person krejtësisht të pafajshëm në një akt të ndërhyrjes së hapur në zgjedhje”, tha ai.
“Kurrë më parë në historinë e kombit tonë ka ndodhur kjo.”
Trump tha se demokratët janë fajtorë për ‘përdorimin si armë të sistemit tonë të drejtësisë për të ndëshkuar një kundërshtar politik’.
Avokatja e Trump, Alina Habba, tha se Trump ‘është viktimë e një versioni të korruptuar dhe të shtrembëruar të sistemit dhe historisë amerikane të drejtësisë’.
“Ai do të shfajësohet,” tha ajo.
Bragg, kur mori detyrën si prokuror qarku në janar 2022, ndaloi ndjekjen e akuzave kundër Trump dhe pezulloi hetimin ‘për një kohë të pacaktuar’, sipas një prej prokurorëve kryesorë që dha dorëheqjen nga zyra në shenjë proteste.
Prokurorët Mark Pomerantz dhe Carey Dunne, të cilët kishin udhëhequr hetimin nën ish prokurorin Cyrus Vance, dorëzuan dorëheqjet e tyre pasi Bragg filloi të ngrinte dyshime për ndjekjen e një çështjeje kundër Trump.
Trump, në fillim të këtij muaji, citoi raporte, të cilat bazoheshin në ato që ai i quajti ‘rrjedhje të paligjshme’, që sugjeronin se ai mund të arrestohej të martën, më 21 mars. Trump postoi në lidhje me ato raporte në faqen e tij ‘Truth Social’, duke bërë që Komiteti Gjyqësor i Kongresit të ndërhynte , duke kërkuar që Bragg të dëshmojë përpara trupit gjykues.
Ligjvënësit republikanë dhe aleatët e Trump e kritikuan hetimin si një ndjekje politike dhe një ‘armë’ të zyrës së prokurorit të qarkut.
Bragg, javën e kaluar, pretendoi se Trump ‘krijoi një pritshmëri të rreme’ se arrestimi i tij ishte i pashmangshëm, duke përmendur postimin në Truth Sociale të ish-presidentit dhe kritikoi komitetin për kryerjen e një ‘hetimi të paprecedentë në një ndjekje penale në pritje’.
“Letra erdhi vetëm pasi Donald Trump krijoi një pritje të rreme se ai do të arrestohej të nesërmen dhe avokatët e tij thuhet se ju kërkuan që të ndërhyni”, shkroi Bragg në një letër drejtuar komitetit.
“Asnjë fakt nuk është një bazë legjitime për hetimin e Kongresit.”
Javën e kaluar, Robert Costello, një ish-këshilltar ligjor i Michael Cohen, dëshmoi para jurisë së madhe të hënën e kaluar se Cohen ishte një ‘gënjeshtar serial’ dhe dëshmoi se Trump nuk dinte për pagesat e bëra nga Cohen për Daniels.
Bragg më pas anuloi procedurat e jurisë së madhe në lidhje me hetimin e Trump të mërkurën dhe të enjten.
Burimet, në atë kohë, i thanë Fox News Digital se kishte ‘përçarje të madhe’ brenda zyrës së prokurorit të rrethit Bragg. Një burim pohoi se prokurori i qarkut ka vështirësi të bindë jurinë e madhe për akuzat e mundshme për shkak të ‘dobësisë’ së çështjes.
Cohen, në vitin 2018, u dënua me tre vjet burg pasi u deklarua fajtor për akuzat federale, duke përfshirë evazion fiskal, gënjeshtra ndaj Kongresit dhe shkelje të financimit të fushatës. Cohen u deklarua fajtor për organizimin e pagesave për Daniels dhe McDougal për t’i penguar ata të dilnin publikisht me aferat e supozuara me Trump, të cilat Trump i ka mohuar vazhdimisht.
Cohen ka thënë se Trump ka drejtuar pagesat, të cilat ish-presidenti i ka mohuar për vite me radhë.
Cohen i pagoi Daniels 130,000 dollarë përmes kompanisë së tij dhe më vonë u rimbursua nga kompania e Trump, e cila i regjistroi pagesat si ‘shpenzime ligjore’. McDougal mori 150,000 dollarë përmes botuesit të tabloidit të supermarketeve National Enquirer.
Organizata Trump ‘arriti’ rimbursimin e Cohen për pagesën e Daniels për ‘qëllime tatimore’, sipas prokurorëve federalë që ngritën kallëzimet penale të vitit 2018 kundër Cohen për pagesat.
Trump ka mohuar në mënyrë të përsëritur keqbërjen në lidhje me pagesat e bëra për Daniels dhe McDougal dhe ka thënë vazhdimisht se pagesat nuk ishin ‘një shkelje e fushatës’, por më tepër një ‘transaksion i thjeshtë privat’.
Michael Cohen, ish-avokat i Presidentit Donald Trump, u deklarua fajtor për akuzat federale në vitin 2018
Pagesat për Daniels u zbuluan për herë të parë në janar 2018 në një raport të Wall Street Journal që thoshte se avokati i Cohen dhe Daniels negociuan një marrëveshje moszbulimi për ta parandaluar atë që të diskutonte publikisht takimin e supozuar seksual me Trump.
Sidoqoftë, në atë kohë, Cohen, Trump dhe madje edhe Stormy Daniels e mohuan marrëveshjen. Në janar 2018, Cohen tha se takimi i supozuar mes Daniels dhe Trump ishte një thashethem që kishte qarkulluar ‘që nga viti 2011’.
Dhe në një letër të datës 10 janar 2018, të marrë dhe shqyrtuar nga Fox News, Daniels gjithashtu mohoi akuzat.
“Kohët e fundit u bëra e vetëdijshme se disa media po pretendojnë se kam pasur një lidhje seksuale ose romantike me Donald Trump shumë, shumë, shumë vite më parë. Unë po e them me qartësi të plotë se kjo është absolutisht e rreme,” shkroi Daniels.
“Përfshirja ime me Donald Trump ishte e kufizuar në disa paraqitje publike dhe asgjë më shumë.”
Daniels shkroi në letër se kur ajo u takua me Trump, ai ishte ‘i pashëm, profesionist dhe një zotëri i plotë për mua dhe për të gjithë në praninë time’. Thashethemet se kam marrë para të heshtura nga Donald Trump janë krejtësisht të rreme”, thuhej në letër.
“Nëse vërtet do kisha një marrëdhënie me Donald Trump, më besoni, nuk do lexonit për të në lajme, do ta lexonit në librin tim. Por fakti është se këto histori nuk janë të vërteta.”
Por në mars 2018, Daniels ndryshoi historinë e saj. Gjatë një interviste me ‘60 Minutes’ të CBS News, Daniels pohoi se ajo pati një takim seksual me Trump.
Ndërkohë, sa i përket pagesës së McDougal, David Pecker, ish-CEO i American Media Inc., dëshmoi para jurisë së madhe të Manhattan të hënën. Ishte të paktën hera e dytë që ai paraqitet para panelit si pjesë e hetimit të Bragg për Trump.
American Media Inc. është kompania mëmë dhe botuese e National Enquirer. Kompania dyshohet se bleu prej saj historinë e McDougal, në të cilën ajo pretendonte një lidhje të kaluar me kandidatin e atëhershëm Donald Trump, për 150,000 dollarë në shtator 2016, javë përpara zgjedhjeve presidenciale të 2016-ës.
Prokurorët federalë në SDNY vendosën në vitin 2018 të mos ngrinin akuza kundër American Media Inc. për shpenzimin e 150,000 dollarëve për të blerë, më pas për të fshehur, historinë e McDougal.
Në atë kohë, American Media Inc., ‘pranoi se qëllimi i saj kryesor në bërjen e pagesës ishte të bllokonte historinë e gruas në mënyrë që të parandalonte që ajo të ndikonte në zgjedhje’.
Akuzat kundër ish-presidentit vijnë pasi Komisioni Federal i Zgjedhjeve, në vitin 2021, hoqi dorë nga rasti për të njëjtën çështje – duke shqyrtuar nëse Trump shkeli ligjin zgjedhor me pagesën prej 130,000 dollarësh për Stormy Daniels, pasi ‘dështoi me një votim 2-2 për të gjetur arsye për të besuar se Donald Trump me vetëdije dhe me dashje shkeli ‘ligjin federal të zgjedhjeve’.
Hetimi ndaj Trump u hap në vitin 2019 nga Prokurori i atëhershëm i Qarkut të Manhatanit, Cyrus Vance. Hetimi u përqendrua në mashtrime të mundshme bankare, sigurimesh dhe taksash. Rasti fillimisht përfshinte marrëveshjet financiare të pronave të Trumpit në Manhatan, duke përfshirë ndërtesën e tij ikonë në Fifth Avenue, ‘Trump Tower’, dhe vlerësimin e pronës së tij prej 213 hektarësh Seven Springs në Westchester.
Prokurori i Përgjithshëm i SHBA-së Mark Garland
Hetimi, vitin e kaluar, çoi në akuza për mashtrim tatimor kundër Organizatës Trump dhe shefit të saj të financave, Allen Weisselberg.
Weisselberg u akuzua se kishte mbledhur më shumë se 1.7 milionë dollarë në kompensim jashtë llogarive, duke përfshirë qiranë e apartamenteve, pagesat e makinave dhe shkollimin. Ëeisselberg, i cili u deklarua fajtor vitin e kaluar, u dënua në janar me pesë muaj burg dhe pesë vjet me kusht. Dëshmia e tij vitin e kaluar ndihmoi në dënimin e Organizatës Trump për mashtrim tatimor.
Ndërkohë, akuzat kundër Trump vijnë në mes të një hetimi të veçantë, të një avokati special për mbajtjen e supozuar të tij të pahijshme të të dhënave të klasifikuara nga presidenca e tij në shtëpinë e tij në Mar-a-Lago.
Gushtin e kaluar, FBI, në një lëvizje të paprecedentë, bastisi rezidencën private të Trump në Mar-a-Lago në lidhje me një hetim mbi të dhënat e klasifikuara që ish-presidenti dyshohet se kishte marrë me vete nga Shtëpia e Bardhë.
Prokurori i Përgjithshëm Merrick Garland më vonë caktoi Jack Smith si këshilltar të posaçëm për të marrë përsipër atë hetim dhe hetimin e Departamentit të Drejtësisë për trazirat e Kapitolit më 6 janar 2021 – veçanërisht nëse Trump ose zyrtarë dhe subjekte të tjerë ndërhynë në transferimin paqësor të pushtetit pas Zgjedhjet presidenciale 2020, duke përfshirë certifikimin e votimit të Kolegjit Zgjedhor më 6 janar 2021.
Akuzat kundër Trump vijnë gjithashtu ndërsa Prokurorja e Përgjithshme e Nju Jorkut Letitia James vazhdon hetimin e saj civil shumëvjeçar ndaj Organizatës Trump për të zbuluar nëse Trump dhe kompania e tij kanë fryrë në mënyrë të parregullt vlerën e aseteve në pasqyrat financiare për të marrë kredi dhe përfitime tatimore.
VINI RE: Kymaterial është pronësi intelektuale e Fox
Përgatiti për Hashtag.al, K.Manjani
