Darya Trepova, e dyshuara për bombardimin e së dielës në Shën Petersburg që vrau blogerin e shquar të luftës Vladlen Tatarsky, është vendosur në listën e të kërkuarve, ka thënë Ministria e Brendshme e Rusisë.
Tatarsky (emri i vërtetë Maksim Fomin) po organizonte një takim të drejtpërdrejtë me mbështetësit e tij në një kafene në qendrën historike të qytetit, kur shpërtheu një bombë, duke e vrarë atë dhe duke plagosur mbi 30 persona.
Një ish-luftëtar nga Donbass, Tatarsky po mbulonte gjerësisht konfliktin e armatosur Rusi-Ukrainë në kanalin e tij Telegram.
Sipas policisë, Trepova është 26 vjeç. Mediat kanë raportuar se forcat e sigurisë po kryenin një kontroll në banesën e saj në Shën Petersburg.
Dëshmitarë të shumtë i thanë mediave ruse se një grua e re, e cila ishte një nga të ftuarit në ngjarjen e Tatarsky, i dha atij një figurinë si dhuratë pak para shpërthimit.
Miqtë e Trepova-s thanë për mediat se ajo ishte studente e mjekësisë dhe punonte në disa punë, duke përfshirë si dizajnere dhe administratore në një dyqan. Një i njohur u tha gazetarëve se Trepova u largua nga Rusia pasi Moska sulmoi Ukrainën vitin e kaluar dhe kaloi disa muaj në Gjeorgji përpara se të kthehej në vendin e saj.
Një shoqe tjetër citohet të ketë thënë se gjatë takimit në Moskë muajin e kaluar, Trepova i tha asaj se po planifikonte të largohej nga Rusia dhe të udhëtonte në Ukrainë përmes Turqisë.
Gazeta RBK citoi një burim policor të thoshte se Trepova shkëmbente mesazhe me Tatarskyn dhe mori pjesë në ngjarje të tjera në të cilat ai mori pjesë. Burimi tha se hetuesit ‘nuk mund të përjashtojnë’ mundësinë që Trepova nuk ishte në dijeni që figura që ajo i dha Tatarskit ishte një bombë.
Sipas burimit, Trepova u arrestua në vitin 2022 në një protestë në Shën Petersburg kundër operacionit ushtarak të Rusisë dhe u dënua me dhjetë ditë arrest administrativ.
