Partia Demokratike ka denoncuar qeverinë për ndërtimin e dy kullave gjigante në stadiumin e Durrësit.
Në një deklaratë për mediat, Sekretarja për Marrëdhëiniet më Publikun Jola Hysaj, tha se qeveria i ka premtuar një ndërtuesi anonim, që do ndërtojë stadium e Durrësit, lejen për dy kulla që do jenë 125 e 155 metra të larta.
“Skema e Tiranës, kullë me stadium, po përsëritet edhe në Durrës. Jo një, por dy kulla i janë premtuar një investitori privat, ende anonim, që do të ndërtojë stadiumin e ri në Durrës. Skema do të përsëritet, ashtu si në Tiranë, edhe sa i takon transparencës. Asnjë qytetar nuk ka parë gjë, nuk është pyetur dhe, të gjithë durrsakët, ashtu si tiransit, do të gjenden para faktit të kryer. Sepse atë që do Partia nuk duhet të diskutohet nga populli. Ndryshimi i vetëm mes kullave të Durrësit dhe asaj të Tiranës është lartësia. Kryeqyteti e ka 112 m ndërsa qyteti bregdetar do të guxojë më shumë në marrëzi, me 125 dhe 155 metra. Ndërtimi i kullave shumë katëshe në lagjen nr.18 ngjan një vendim absurd, duke pasur parasysh se zona ishte ndër më të dëmtuarat nga lëkundjet sizmike të tërmetit të 26 nëntorit 2019.” – tha Hysaj.
Më tej në deklaratën e saj Hysaj shtoi se ndërtuesi privat ka në plan të ndërtojë stadiumin me kapacitet 12 mijë vende, ndërkoha kërkoi transparencë mbi investitorin, kush e ka marrë vendimin dhe e ka pasur këshillim me komunitetin që preket nga projekti.
“Betonizmi i vijës bregdetare, i kompleksit antik mijëravjecar të qytetit do të vijojë edhe nga pjesët e fundit, mbetur pa pushtuar në qytet. Investitori privat, emri i të cili ende nuk është bërë publik, ka në project ide ndërtimin e një stadiumi me kapacitet 12 mijë vendesh, krahasuar me aktualin, që ka 8500 ulëse. Pra nuk ka ndonjë ndryshim të madh në kapacitet, por qëllimi janë kullat, ndërsa stadiumi është preteksti. Në truallin ku do të ndërtohen kullat, ndodhen dy fusha stërvitore, dy kalceto dhe dy fusha basketbolli. Partia Demokratike kërkon, së pari, transparencë. Publiku duhet të dijë se kush është investitori, cili është plani, kush e ka marrë vendimin, a ka patur konsultim me komunitetin që preket nga prishja e terreneve sportive aktuale etj. Ajo që dihet është vetëm se, në shkurt, Edi Rama hapi konkursin ndërkombëtar për ndërtimin e stadiumeve në qytetet e Vlorës, Durrësit dhe Korçës. Ajo që dihet dhe që e theksojnë ekspertët, mediat e brendshme dhe të huaja, është se sektori i ndërtimit është parajsa e pastrimit të parave të narko-trafikut. Ajo që gjithashtu dihet është se Kryeministri, në mungesë të një projekti qeverisës, që i mban shqiptarët në vendin e vet, ka vendosur t’i dëbojë ata duke i kaluar pasuritë dhe projektet publike në duart e “klanit të babëzisë” me të cilët ndan paratë. Qytetarët e Durrësit e dinë mirë se për cfarë ka nevojë qyteti. Një stadium i ri mund të jetë një dëshirë, por qyteti nuk ka nevojë për “bukë e cirk”. Durrësi ka të kaluar romake, por nuk jemi më në kohën e Romës antike, kur peradori merrte vendime dhe populli ftohej në amfiteatër për të harruar qeverisjen e keqe.” – mbyllet njoftimi.
