Qeveria federale e Kanadasë dhe një grup indigjenësh kanë arritur një marrëveshje të rishikuar prej 23.34 miliardë dollarësh kanadezë (17.35 miliardë dollarë amerikanë) për të kompensuar fëmijët dhe familjet e Kombeve të Para për dekadat e dëmit të shkaktuar nga një sistem diskriminues i mirëqenies.
Kushtet e marrëveshjes, të shpallura nga qeveria kanadeze në një deklaratë të mërkurën, u rishikuan për të zgjeruar pranueshmërinë e kompensimit dhe për të rritur shumën nga 20 miliardë dollarët fillestarë të rënë dakord vitin e kaluar, shkruan Reuters.
Marrëveshja, e cila prek rreth 300,000 fëmijë, të rinj dhe familje të Kombeve të Para, synon të zgjidhë një ankesë të paraqitur në një gjykatë të të drejtave të njeriut më shumë se 15 vjet më parë kundër Kanadasë për financimin e saj për mirëqenien e fëmijëve indigjenë.
Gjykata vendosi në vitin 2016 që qeveria federale ndau më pak fonde për shërbimet e fëmijëve dhe familjes së indigjenëve sesa për të tjerët, duke shtyrë më shumë fëmijë indigjenë në kujdestari.
Qeveria federale është përgjegjëse për financimin e shërbimeve të mirëqenies së fëmijëve për fëmijët në rezervat e Kombeve të Parë. Provincat individuale financojnë shërbimet e mirëqenies së fëmijëve për fëmijët jo-vendas dhe fëmijët vendas që nuk jetojnë në rezerva, duke krijuar një sistem me dy nivele.
“Kjo marrëveshje përfundimtare e zgjidhjes me vlerë prej 23 miliardë dollarësh kanadezë është një pikë kthese e vonuar për kaq shumë mijëra familje,” tha Cindy Ëoodhouse, shefja rajonale e Asamblesë së Kombeve të Parë në Manitoba.
Indigjenët e Kanadasë kanë nivele më të larta varfërie dhe jetëgjatësi më të ulët se kanadezët e tjerë dhe janë më shpesh viktima të krimit të dhunshëm, varësisë dhe burgosjes.
Kryeministri Justin Trudeau u zotua të riparojë marrëdhëniet me kanadezët indigjenë pas ardhjes në pushtet në 2015.
