Drejtori i CIA-s, William Burns, u ka thënë zyrtarëve sauditë se Shtetet e Bashkuara u kapën në befasi, pasi mbretëria ra dakord për një marrëveshje normalizimi marrëdhëniesh me Iranin të ndërmjetësuar nga Kina, sipas Wall Street Journal.
Gjatë një udhëtimi të paparalajmëruar në Arabinë Saudite këtë javë, Burns ‘shprehu zhgënjimin’ me Riadin dhe tha se Uashingtoni ‘ndihej i verbër’ nga diplomacia e rinovuar saudite me Iranin dhe Sirinë, thanë burime të shumta pa emër për WSJ.
Ministrat e Jashtëm të Iranit dhe Arabisë Saudite zhvilluan bisedime në kryeqytetin kinez të enjten, ku diskutuan një sërë çështjesh në lidhje me nismën e re, duke përfshirë rihapjen e ambasadave në dy vendet, caktimin e ambasadorëve dhe madje edhe një vizitë në Riad nga presidenti Iranian.
Pas vitesh mosmarrëveshjesh si kundërshtarë rajonalë, Teherani dhe Riadi përfunduan paktin e normalizimit më 10 mars pas bisedimeve sekrete të ndërmjetësuara nga Pekini, duke rënë dakord për të rifilluar marrëdhëniet zyrtare diplomatike pasi ata ndërprenë lidhjet në vitin 2016. Marrëveshja shënoi një arritje të madhe diplomatike për Kinën dhe një lëkundje në gjeopolitikën e Lindjes së Mesme.
Që nga shpallja e marrëveshjes, diplomatët e lartë nga Arabia Saudite dhe Irani kanë folur në telefon të paktën tre herë dhe shpresojnë të arrijnë kompromise për disa çështje të pazgjidhura – konkretisht luftën në Jemen, e cila ka vazhduar për më shumë se tetë vjet.
Teherani po punon gjithashtu për të rivendosur kontaktet me Emiratet e Bashkuara Arabe, një tjetër monarki e Gjirit në kundërshtim me Republikën Islamike. Në fillim të kësaj jave, zëvendësministri i Jashtëm iranian Ali Bagheri tha se vendi i tij kishte emëruar një ambasador në Abu Dhabi për herë të parë në gati një dekadë.
Riadi po ashtu thuhet se po kërkon të arrijë një mirëkuptim të ngjashëm me Sirinë dhe shpreson të ftojë presidentin Bashar al-Assad për një vizitë më vonë këtë vit, sipas Reuters.
Ndërsa Shtëpia e Bardhë e ka mirëpritur diplomacinë e re në publik, ankesat e raportuara të Burns drejtuar zyrtarëve sauditë këtë javë mund të nxjerrin në pah shqetësimet mbi ndikimin në rritje të Pekinit në rajon.
Tensionet midis Riadit dhe Uashingtonit kanë qenë gjithashtu në rritje që nga viti i kaluar, kur OPEC+, një grup eksportuesish të mëdhenj të naftës të udhëhequr nga Arabia Saudite, zgjodhi të pakësonte prodhimin e naftës.
Lëvizja thuhet se ‘zemëroi’ presidentin Joe Biden, i cili pretendoi se nga shkurtimi do përfitonte Rusia, një tjetër eksportues i madh i energjisë.
