Presidenti tunizian ka hedhur poshtë kushtet e një ndihme të ngecur prej 1.9 miliardë dollarësh nga Fondi Monetar Ndërkombëtar (FMN), duke përmendur ndikimin e huaj të papranueshëm dhe rrezikun e rritjes së varfërisë.
Kais Saied tha se ‘nuk do dëgjojë diktatin’ dhe argumentoi se shkurtimi i subvencioneve shtetërore do shkaktojë trazira sociale, ndërsa paralajmëroi se ‘paqja publike nuk është një lojë’.
Tunizia arriti një marrëveshje të nivelit të stafit me FMN-në në tetor 2022 për një kredi për të mbështetur ekonominë për një periudhë 48-mujore. Sidoqoftë, marrëveshja, e cila supozohej të miratohej në dhjetor 2022, u shty pasi vendi i Afrikës së Veriut nuk arriti të përmbushte angazhimet kryesore.
Kushtet e kredisë përfshijnë shkurtime të subvencioneve për ushqimin dhe energjinë, si dhe një ulje në faturën e pagave publike.
“Është e vërtetë që disa njerëz që nuk kanë nevojë për subvencione po përfitojnë prej tyre, por ne mund të gjejmë mënyra të tjera për t’u siguruar që ata të arrijnë tek ata që i meritojnë,” u tha presidenti gazetarëve.
Muajin e kaluar Banka Botërore pezulloi huadhënien e re për Tunizinë pasi presidenti Saied dyshohet se bëri komente nxitëse për emigrantët afrikanë Sub-Sahariane, duke nxitur akuza për racizëm. Një burim i Bankës Botërore i tha Africanews se FMN-ja tani do përballet me presion të shtuar për të mos miratuar paketën e shpëtimit.
Megjithëse anëtarët e qeverisë tuniziane po bëjnë presion për një marrëveshje me FMN-në, presidenti Saied këmbënguli se ‘tunizianët duhet të mbështeten tek vetja’ për të gjetur një zgjidhje alternative.
Tunizia ka propozuar një ulje prej 26.4% të shpenzimeve të subvencioneve në 2.89 miliardë dollarë në buxhetin e saj të vitit 2023, por qeveria ende nuk i ka rritur çmimet e karburantit këtë vit, për të shmangur zemërimin publik.
