Sfida mes Kastriotit dhe Bylisit paracaktuar për tu luajtur ditën e sotme është anuluar pasi janë kërcënuar arbritrat e ndeshjes.
Njoftimin e ka bërë vetë qeveria shqiptare e futbollit e cila menaxhon edhe mbarëvajtjen e Superiores.
Në njoftim FSHF-ja duket se e “ka futur në rreth të kuq” Kastriotin pasi sipas tyre arbritrat nuk duan që drejtojnë sfida të këtij klubi për shkak të presioneve që marrin.
Sipas FSHF-së ky është një rast i përsëritur pasi edhe në sfidën ndaj Kastrioti-Laçi arbritrat u kërcënuar me jetë për të anuluar një gol të skuadrës së Laçit.
Njoftimi:
Federata Shqiptare e Futbollit dëshiron të informojë komunitetin e futbollit dhe opinionin publik se ndeshja Kastrioti-Bylis e planifikuar për t’u zhvilluar ditën e sotme në stadiumin e Kamzës nuk do të zhvillohet.
Ditën e djeshme arbritrat e ndeshjes janë kërcënuar dhe kjo ngjarje është duke u hetuar nga organet kompetente. Federata e Futbollit është njohur me vendimin e të gjithë klasës arbitrale, që nuk pranon të marrë përsipër drejtimin e ndeshjeve të Klubit Kastrioti për shkak të presioneve dhe shantazheve të vazhdueshme.
Një javë më parë, në ndeshjen Kastrioti-Laçi arbitrat e ndeshjes janë kërcënuar me jetë dhe janë detyruar të anulojnë një gol për skuadrën e Laçit. Të ndjerë vazhdimisht të kërcënuar zyrtarët kanë pasur frikë të deklarojnë me shkrim apo të denoncojnë ngjarje të tilla.
Të gjendur në këtë situatë, FSHF bën me dije se do të presë deri në fund zbardhjen e ngjarjes së ndodhur ditën e djeshme dhe do të marrë vendimet e duhura për të siguruar ambientin e sigurt në panoramën futbollistike shqiptare.
