Qeveria izraelite lëshoi një deklaratë të dielën duke hedhur poshtë me vendosmëri pohimet e përfshira në dokumentet e zbuluara të Pentagonit se udhëheqja e Mossad, shërbimi i inteligjencës së jashtme izraelite, kishte nxitur stafin e agjencisë dhe qytetarët izraelitë të merrnin pjesë në protestat antiqeveritare që tronditën vendin.
Mossad dhe zyrtarë të tjerë të lartë të mbrojtjes izraelite mohuan gjetjet e vlerësimit ndërsa ‘New York Times’ nuk ishte në gjendje të verifikonte në mënyrë të pavarur vlerësimin e inteligjencës së SHBA-së.
Deklarata e lëshuar të dielën nga zyra e kryeministrit izraelit në emër të Mossad-it e përshkroi pohimin si ‘dëshpërues dhe pa asnjë bazë’.
Zyrtarë të lartë amerikanë thanë se FBI-ja po punonte për të përcaktuar burimin e dokumenteve të zbuluara. Zyrtarët pranuan se dokumentet dukej se ishin informacione legjitime të inteligjencës dhe operative të përpiluara nga Shtabi i Përbashkët i Pentagonit, duke përdorur raporte nga komuniteti i inteligjencës së qeverisë, por që të paktën një prej tyre ishte modifikuar nga origjinali në një moment të mëvonshëm.
Megjithatë, vërtetësia e dukshme e dokumenteve nuk është një tregues i saktësisë së tyre. Izraeli, i cili e ktheu kryeministrin Benjamin Netanyahu në pushtet në dhjetor si kreu i koalicionit qeveritar më të ekstremit të djathtë në historinë e tij, u paralizua nga protestat dhe grevat në mars pasi qeveria zbuloi planet për të reformuar gjyqësorin e vendit.
Ndryshimet e propozuara, të cilat u kritikuan nga aleati më i afërt i Izraelit, Shtetet e Bashkuara, synojnë të frenojnë shqyrtimin gjyqësor të legjislacionit dhe t’i japin qeverisë më shumë kontroll në përzgjedhjen e gjyqtarëve.
Sipas dokumenteve të zbuluara, një vlerësim që i atribuohet një përditësimi të Inteligjencës Qendrore nga 1 Marsi, udhëheqësit e Mossad-it ‘avokuan që zyrtarët e Mossad-it dhe qytetarët izraelitë të protestonin kundër reformave gjyqësore të propozuara nga qeveria e re izraelite, duke përfshirë disa thirrje të qarta për veprim që dënonin qeverinë izraelite’.
Sipas dokumenteve, informacioni është marrë përmes inteligjencës sinjalizuese. Shumë nga dokumentet e zbuluara janë etiketuar me urdhra që ato duhet të ndahen vetëm midis agjencive të inteligjencës amerikane.
Zyrtarët aktualë dhe ish-zyrtarë të inteligjencës izraelite thanë se rregullat e agjencisë dhe tradita e gjatë e jopartishmërisë do kishin përjashtuar përfshirjen e drejtpërdrejtë të udhëheqjes së agjencisë në një krizë politike.
Qeveria izraelite tha në deklaratën e saj se ‘Mossad dhe zyrtarët e saj të lartë nuk e nxitën dhe nuk e nxisin personelin e agjencisë që t’i bashkohet demonstratave kundër qeverisë, demonstratave politike ose ndonjë aktiviteti politik’.
Ai shtoi: “Mossad dhe personeli i tij i lartë në shërbim nuk janë përfshirë fare në çështjen e demonstratave dhe janë të përkushtuar ndaj vlerës së shërbimit ndaj shtetit që ka udhëhequr Mossad-in që nga themelimi i tij.”
Megjithatë, disa punonjës të Mossad-it kërkuan dhe morën leje për të marrë pjesë në demonstrata si qytetarë privatë. Shefi i Mossad-it, David Barnea, në konsultim me Prokurorin e Përgjithshëm të Izraelit, lejoi punonjësit e rinj të merrnin pjesë për aq kohë sa ata nuk e identifikonin veten si anëtarë të organizatës, sipas një zyrtari të mbrojtjes të njohur me politikën e agjencisë.
Disa qindra ish-punonjës të Mossad-it, duke përfshirë pesë ish-shefa, nënshkruan gjithashtu një deklaratë në mars duke kundërshtuar reformën e nxitur nga qeveria.
Komentatorët politikë izraelitë thanë të dielën se vlerësimi i zbuluar duket se ngatërron nocionet e ‘nxitjes’ dhe ‘lejimit’ dhe duke përzier veprimet e ish-punonjësve të Mossad me ato të punonjësve aktualë.
Në fund të fundit, protestuesit penguan përparimin e propozimit dhe qeveria tha se do vononte legjislacionin për disa javë dhe do lejonte kohë për bisedime me partitë opozitare.
Vetë Mossad nuk ka marrë kurrë një qëndrim për ndonjë polemikë politike apo sociale në Izrael. Gjithashtu, ndryshe nga Shin Bet, që merret me sigurinë e brendshme, Mossad punon ekskluzivisht jashtë vendit.
Informacioni i përfshirë në dokumentet e zbuluara, megjithatë, ka disa mbivendosje me akuzat e pabazuara të promovuara nga Yair Netanyahu, djali i kryeministrit. Netanyahu i ri ka pohuar se pas protestës qëndronin elementë armiqësorë brenda komunitetit të inteligjencës izraelite dhe Departamentit të Shtetit të SHBA-së. Departamenti i Shtetit ka mohuar çdo përfshirje.
VINI RE: Ky material është pronësi intelektuale e NY Times
Përgatiti për Hashtag.al, K.Manjani
