Kryeministri Rama shkruan sot se dyfishimi i pagës mesatare në vend, duke shkuar në 900 euro në 2024 është frut i një përpjekjeve të gjatë e durimi për reforma të vështira si dhe rritjes sëtë ardhurave falë rritjes së ekonomisë, tregtisë e investimeve publike e private.
Kreu i qeverisë shton se në rritjen e pagave kanë ndikuar edhe rritja e prodhimit, eksporteve, modernizimit të mbledhjes së taksave, forcimit të shtetit e uljes së korrupsionit në tatime e dogana.
“PAGAT E REJA, falë të cilave paga mesatare në Shqipëri thuajse dyfishohet duke arritur majën historike të 900 Eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, PAGAT E REJA janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet.” – shkruan Rama.
