Qeveria italiane ka vendosur një gjendje të jashtëzakonshme gjashtëmujore në një përpjekje për të trajtuar një rritje të fundit të numrit të emigrantëve të rinj të ardhur në vend. Si pjesë e masës, autoritetet po planifikojnë të ndajnë 5 milionë euro për të ndërtuar objekte të reja mbajtjeje për ta.
Vendimi u bë i ditur të martën. Ministri për Mbrojtjen Civile e Politikat Detare, Nello Musumeci, përmendi qendrat e pritjes të mbipopulluara dhe zbuloi se gjendja e jashtëzakonshme ishte shpallur me urdhër të ministrit të Brendshëm Matteo Piantedosi.
Hera e fundit që një qeveri italiane iu drejtua shpalljes së një emergjence për emigracionin ishte në vitin 2011 nën Silvio Berlusconin.
Sipas një deklarate të lëshuar nga autoritetet italiane, ata shpresojnë të krijojnë ‘mjedise të reja të përshtatshme si për nevojat e pritjes ashtu edhe për riatdhesimin e emigrantëve’ që nuk kanë të drejtë të qëndrojnë.
Mediat italiane kanë raportuar se në të ardhmen e afërt do zgjidhet një komisioner i posaçëm i ngarkuar me mbikëqyrjen e shpërndarjes së fondeve. Ndërsa disa kandidatë janë sugjeruar në shtyp, me sa duket nuk është marrë një vendim zyrtar deri më tani.
Në fillim të marsit, më shumë se 17,000 emigrantë kishin arritur në Itali, gati trefishi i shifrës së regjistruar gjatë së njëjtës periudhë në 2022.
Kryeministrja Giorgia Meloni erdhi në pushtet vitin e kaluar, duke u zotuar të rrisë deportimet dhe të ndalojë anijet e OJQ-ve që të sjellin emigrantë në portet italiane. Edhe pse qeveria ka arritur të pakësojë numrin e anijeve të tilla që operojnë në brigjet e Italisë, numri i të ardhurve të rinj megjithatë ka vazhduar të rritet.
