Të paktën 165 persona, duke përfshirë 27 gra dhe 19 fëmijë, u vranë pasi junta ushtarake e Mianmarit bombardoi qytezën Kanbalu në rajonin qendror Sagaing të martën, shkroi në Twitter ministrja e të drejtave të njeriut e Qeverisë së Unitetit Kombëtar, Aung Myo Min, përpara se të konfirmonte shifrat për CNN.
30 persona të tjerë u plagosën, 20 prej të cilëve mbeten në gjendje të rëndë, duke përfshirë një grua shtatzënë dhe një fëmijë tetë vjeç. Nga ata që vdiqën, 158 trupa janë djegur, shtoi Aung Myo Min.
Reaguesit e parë dhe ekipet mjekësore nuk kanë qenë në gjendje të kthehen në vendin e sulmit sepse avionët ushtarakë kanë vazhduar të fluturojnë mbi qytet, megjithëse nuk ka pasur sulme të mëtejshme, tha më herët Aung Myo Min.
Rreth 300 njerëz ishin mbledhur në fshatin Pazigyi herët të martën në mëngjes për të festuar hapjen e një zyre të administratës lokale, tha një dëshmitar okular në kushte anonimiteti, sepse ai i frikësohet ndëshkimit. Familjet kishin udhëtuar nga fshatrat e afërt për ngjarjen, ku ofrohej çaj dhe ushqim dhe që përkoi me fillimin e festimeve të Vitit të Ri Thingyan.
