Mbi 50 persona raportohet se janë vrarë dhe rreth 600 janë plagosur në përleshjet e ashpra midis fraksioneve rivale në Sudan, pasi ushtria e vendit dhe Forcat e Mbështetjes së Shpejtë (RSF) vazhdojnë të akuzojnë njëra-tjetrën për ndezjen e gjakderdhjes.
Sipas vlerësimeve të fundit nga mjekët, të cituar nga Reuters, të paktën 56 persona janë vrarë dhe 595 të tjerë janë plagosur që nga mëngjesi i së dielës. Një tjetër sindikatë mjekësore, Sindikata e Mjekëve të Sudanit, i tha më parë AP se ishte e paqartë se sa nga viktimat ishin civilë dhe paralajmëroi se numri i të vdekurve mund të rritet për shkak të ‘shumë viktimave të panumërta’ në pjesë të ndryshme të vendit.
Mosmarrëveshja për mënyrën sesi RSF-ja duhet të integrohet në ushtri dhe cili autoritet duhet të mbikëqyrë procesin, çoi në shpërthimin e gjakderdhjes të shtunën në mëngjes, me të shtëna armësh dhe shpërthime të dëgjuara në të gjithë kryeqytetin gjatë gjithë ditës e natës.
Të dyja palët përdorën automjete të blinduara dhe kamionë me mitralozë të montuar në betejat në kryeqytetin Khartoum, sipas videove dramatike. Dëshmitarët raportuan gjithashtu se kishin parë tanke dhe avionë, pasi ushtria tha se kreu disa sulme ajrore kundër pozicioneve të RSF-së.
Njësia paraushtarake pretendoi se kishte pushtuar pallatin presidencial, stacionin televiziv shtetëror, aeroporte të shumta dhe rezidencën e shefit të ushtrisë dhe tha se kishte shkaktuar viktima të rënda në ushtrinë sudaneze. Udhëheqësi i RSF-së pohoi se forcat e tij janë nën kontrollin e 90% të vendeve strategjike në kryeqytet, Khartoum.
Ushtria këmbëngul se të gjitha objektet strategjike në kryeqytet dhe në mbarë vendin janë ende nën kontrollin e saj. Ushtria përjashtoi bisedimet me RSF-së, duke e quajtur atë një ‘milici rebele’ që duhet të shpërbëhet.
Rivaliteti daton që nga sundimi i presidentit Omar al-Bashir, i cili u rrëzua në prill 2019. Sudani që atëherë ka qenë në një gjendje krize politike. Vendi drejtohet nga Këshilli Sovran Tranzicional. Presidenti i saj – dhe sundimtar de fakto i kombit – është shefi i ushtrisë, gjenerali Abdel Fattah Al-Burhan. Komandanti i RSF-së, gjenerali Mohamed Hamdan Dagalo, i njohur gjithashtu si Hemedti, është nënkryetari.
Bilanci i saktë i fuqisë dhe gjendja në terren mbetet e paqartë, me komunitetin ndërkombëtar që bën thirrje për një armëpushim. Kombet e Bashkuara, Bashkimi Afrikan dhe Liga Arabe u kanë kërkuar palëve që të kthehen në bisedime.
Kina u kërkoi bisedimeve midis palëve ndërluftuese për të ‘parandaluar përshkallëzimin e situatës’, ndërsa SHBA u bëri thirrje ‘të gjithë aktorëve të ndalojnë menjëherë dhunën dhe të shmangin përshkallëzimin e mëtejshëm ose mobilizimin e trupave’.
