Ushqimet tradicionale shqiptare janë prezantuar në panairin “Slow Food” në Shtutgard, ku e pranishme ishte edhe ministrja Frida Krifca me ftesë të homologut gjerman Cem Özdemir, i cili rekomandoi Shqipërinë, si një vend që duhet vizituar me patjetër, jo vetëm për bukrinë që ofron, por edhe për ushqimet e shijshme, ku 45 prej të tyre u prezantuan në Shtutgart.
“E kam shijuar kuzhinën shqiptare dhe do ta rekomandoja Shqipërinë, një vend për t’u vizituar, ku fermerët e vegjël kanë padyshim një rol të rëndësishëm”, tha Özdemir.
Ministri gjerman falënderoi Krifcën për prezencën e saj në Panairin e Shtutgardit, teksa e cilësoi vizitën e saj një mbështetje të rëndësishme në promovimin e prodhuesve shqiptarë dhe mbështetjen e produkteve autoktone
“Ju përfaqësoni Shqipërinë dhe mbështesni prodhimet autoktone shqiptare si faktor të rëndësishëm në zhvillimin rural”, tha Ozdemir.
Krifca tha se Gjermania është një partemri i rëndësishëm për vendin tonë.
“Ne e shohim Gjermaninë një partner i rëndësishëm i Shqipërisë drejt rrugës ambicioze për t’u integruar në Bashkimin Evropian. Jam optimiste për partneritetin që kemi me ministrin Ozdemir dhe vlerësoj mbështetjen e tij për Shqipërinë, për Ministrinë e Bujqësisë dhe Zhvillimit Rural të Shqipërisë. Kemi së bashku një plan veprimi me disa hapa konkretë që do të vihen në veprim nën asistencën gjermane. Ne do të kemi një atashe në rajon, i cili do të na ndihmojë të ndërtojmë këtë urë”, deklaroi ministrja Krifca.
Në Panairin e Shtutgardit morën pjesë mbi 700 ekspozues, në më shumë se 20 000 metra katrorë ku paraqitën produkte të grurit, mishit, peshkut, frutave, perimeve, bimëve aromatike dhe mjekësore dhe sigurisht ëmbëlsirat. Në stendën e Shqipërisë u prezantuan 11 prodhues anëtarë të lëvizjes Sloë Food.
“Sipërmarrjet agroturistike në vend po zhvillojnë traditën e ‘ushqimit të ngadaltë’ shqiptar. Ata e bëjnë këtë duke promovuar ushqim të pastër dhe të drejtë dhe biodiversitet. Rilidhja e prodhuesve të ushqimit me ata që konsumojnë ushqimin është një element tjetër i rëndësishëm i lëvizjes së “ushqimit të ngadaltë”. Është një nocion i fuqishëm që mund të ndryshojë perspektivën se si duhet të prodhojmë dhe konsumojmë ushqim,” u shpreh ministrja Krifca.
