Kandidati i koalicionit “Bashkë Fitojmë” për Bashkinë e Tiranës, Belind Këlliçi, zhvilloi një takim me subjektet që operojnë në tregun në zonën e “5 Majit”.
Tregtarët treguan se janë duke kaluar ditë të vështira ku shitjet kanë rënë në mënyrë drastike.
Belind Këlliçi u prezantoi paketën e uljes së taksave dhe tarifave vendore, të cilat pas 14 majit do të lehtësojnë barrën fiskale që biznesi i paguan bashkisë së Tiranës.
“Të gjithë tregtarët që po takoj këtu, e njëjta gjë. Situata keq e më keq. Kemi planin për taksat, për tarifat, për biznesin e vogël, t`i japim frymëmarrje. Planin për uljen e taksave dhe tarifave ta garantoj që do e bëjmë realitet. Aty është programi për të ulur taksat dhe tarifat, për të fituar më shumë biznesi i vogël. 41 mijë biznese të vogla janë në Tiranë. Një njeri me punësu më shumë, me pas më shumë të ardhura, janë 41 mijë vetë më shumë. Ecën ekonomia, ka lekë, ka gjallëri, ka optimizëm.”- tha Këlliçi.
Ashtu si kudo në Tiranë, edhe Tregu Industrial rrezikon të shembet për t`i hapur rrugë ndërtimit të kullave. Belind Këlliçi u shpreh se ky projekt i Erion Veliajt duhet ndalur, pasi aty janë mijëra njerëz të punësuar direkt dhe indirekt, që mbajnë familjet.
“Më kryesorja është, për mendimin tim, është me ndalu projektin që kanë se duan ta shembin tregun të bëjnë pallate. Ky është problem. Këtu janë mijëra familje të punësuar po ta marrësh, se nuk është vetëm biznesi, por janë shërbimet, janë të gjithë ata që përfitojnë”, deklaroi Këlliç.
Teksa shtrëngoi duart me bizneset, Belind Këlliçi shprehu zotimin që pas 14 majit të sjellë ndryshimin në kryeqytet.
“Duhet të bëhemi bashkë, t`u heqim frikën njerëzve sepse i kanë mbytur me idenë, nuk bëhet ndryshimi, nuk bëhet ndryshimi. Jo, bëhet ndryshimi, vetë e kemi në dorë, me votë ndëshkoje të kutia, ke kutia votën, kaq. Unë jam i vendosur ta sjellë ndryshimin se kam vendosur të jetoj vetë në këtë vend.”-tha Belind Këlliçi.
