Parler, një platformë e mediave sociale me prirje konservatore e popullarizuar në mesin e mbështetësve të ish-presidentit amerikan Donald Trump, u mbyll në fillim të kësaj jave pas blerjes së saj nga konglomerati i mediave dixhitale Starboard.
Pronari i ri i platformës, e cila më parë quhej Olympic Media, njoftoi blerjen të premten. Parler ‘siç është krijuar aktualisht’ është mbyllur ‘për t’iu nënshtruar një vlerësimi strategjik’, tha Starboard në një deklaratë të publikuar në faqen kryesore të platformës.
Ajo nuk tha se kur do mund të kthehej Parler apo çfarë ndryshimesh planifikojnë të prezantojnë pronarët e rinj. Në vend të kësaj, Starboard tha se sheh ‘mundësi të jashtëzakonshme në shumë sektorë për të vazhduar t’u shërbejë komuniteteve të margjinalizuara apo edhe të censuruara plotësisht’.
Pronarët e rinj pohuan se ‘asnjë person i arsyeshëm nuk beson se një klon i Twitter vetëm për konservatorët është më një biznes i qëndrueshëm’. Shefi i Starboard Ryan Coyne tha se kompania e tij po pret me padurim të përfshijë audiencën e platformës së mediave sociale ‘në të gjitha platformat tona ekzistuese’.
E themeluar nga Coyne në 2018, Starboard strehon disa platforma të tjera me prirje konservatore si American Wire dhe BizPac Review. Kompania tha se pret që marrëveshja e blerjes së Parler të jetë akretive deri në fund të tremujorit të dytë të 2023.
Zhvillimi vjen muaj pas rënies së një marrëveshjeje tjetër që do kishte parë Parler të ishte blerë nga reperi amerikan, Kanye West, i cili ligjërisht ka ndryshuar emrin e tij në Ye. Ai kërkoi të blinte platformën e mediave sociale pasi u pezullua në Instagram dhe Twitter. Dy gjigantët e mediave sociale e ndaluan atë pas komenteve në lidhje me popullin hebre.
Në dhjetor, Parler tha se kompania dhe West nuk e kishin mbyllur marrëveshjen. Parler u themelua në vitin 2018 nga John Matze dhe Rebekah Mercer, vajza e miliarderit Robert Mercer, bashkëpronar i faqes së internetit konservatore të lajmeve Breitbart.
Rrjeti social u hoq nga App Store i Apple dhe Google Play Store për lejimin e ‘përmbajtjes së dhunshme’ pas sulmit në ndërtesën e Kapitolit të SHBA-së. Amazon gjithashtu e hoqi atë nga shërbimi i saj i mbajtjes në internet në atë kohë.
Në maj 2021, ai u kthye në App Store pasi prezantoi moderimin më të fortë të përmbajtjes. Google Store e riktheu atë në shtator 2022.
