Ambasadori i BE-së në Sudan u sulmua të hënën mes përleshjeve të vazhdueshme midis ushtrisë së vendit dhe një grupi paraushtarak me ndikim, Forcat e Mbështetjes së Shpejtë (RSF), tha kryediplomati i bllokut, Josep Borrell.
I dërguari u ‘sulmua në rezidencën e tij’, shkroi Borrell në Twitter. Ai nuk ka treguar asnjë hollësi në lidhje me incidentin dhe nuk ka treguar se kush qëndron pas sulmit. Është e paqartë nëse ambasadori i BE-së u lëndua në sulm.
Borrell e quajti incidentin një ‘shkelje të rëndë të Konventës së Vjenës’, duke shtuar se siguria e misioneve diplomatike është përgjegjësi e vendit pritës sipas ligjit ndërkombëtar.
Rreth dy orë më parë, kryediplomati i BE-së tha në një postim tjetër në Twitter se blloku ‘po punonte për të bindur secilën palë të konsideronte një pauzë humanitare dhe të nxiste dialogun’, duke shtuar se ‘duhet urgjentisht një armëpushim’.
Më herët të hënën, Al Arabiya raportoi se një automjet i ambasadës amerikane u sulmua gjithashtu në Sudan. Burime nga ambasada thanë për median se luftëtarët e RSF hapën zjarr ndaj automjetit të blinduar.
Makina ishte shënjestruar qëllimisht, thanë burimet, duke shtuar se ndaj saj janë qëlluar rreth 100 plumba. Askush nuk u lëndua në incident, sipas Al Arabiya.
Përleshjet shpërthyen të shtunën në Sudan në mes të luftës së vazhdueshme për pushtet midis Forcave të Armatosura Sudaneze (SAF) të gjeneralit Abdel Fattah al-Burhan dhe RSF-së, të udhëhequr nga zëvendësi i tij, Mohamed Hamdan Daglo. Burhan ka udhëhequr de fakto qeveritë e përkohshme të vendit që kur sundimtari afatgjatë i vendit, Omar Al-Bashir, u rrëzua në një grusht shteti në vitin 2019.
Khartoum ka dëshmuar të shtëna me armë zjarri dhe bombardime intensive gjatë ditëve të fundit, të cilat kanë çuar në vdekjen e të paktën 97 civilëve dhe kanë lënë 365 të tjerë të plagosur, sipas autoriteteve mjekësore sudaneze.
