Grupi paraushtarak i Forcave të Mbështetjes së Shpejtë të Sudanit (RSF) njoftoi një armëpushim humanitar 72-orësh duke filluar nga ora 6 e mëngjesit me orën lokale të së premtes, duke thënë se kjo përkon me festën myslimane të Fitër Bajramit që shënon fundin e muajit të agjërimit të Ramazanit, sipas AA.
“Armëpushimi përkon me festën e Fitër Bajramit dhe hapjen e korridoreve humanitare për të evakuuar qytetarët dhe për t’u dhënë atyre mundësinë për të përshëndetur familjet e tyre”, njoftoi RSF në një deklaratë në Twitter.
Në deklaratë, RSF-ja pohoi angazhimin e saj për një armëpushim të plotë dhe paralajmëroi kundër “shkeljeve të vazhdueshme të palës tjetër”.
Luftimet shpërthyen të shtunën midis Forcave të Armatosura Sudaneze (SAF) dhe RSF në kryeqytetin Khartoum dhe rrethinat e tij.
RSF akuzoi ushtrinë se kishte sulmuar forcat e saj në jug të Khartoum me armë të lehta dhe të rënda, ndërsa ushtria pretendoi se forca paraushtarake po “përhap gënjeshtra” dhe e etiketoi atë një grup “rebel”.
Sudani ka qenë pa një qeveri funksionale që nga tetori 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme në atë që forcat politike e quajtën “grusht shteti”.
