Luçiano B oçi i është përgjigjur kryeministrit Rama, i cili e ironizoi sot duke e krahasuar me ish-kreun e PD-së Basha. Gjatë një takimi me qytetarët e Elbasanit, kreu i qeverisë tha se Boçi bën si aktor dhe se lidh kontrata koti me kompani.
“Ky Luçi më kujton Lulin, por ky është më poshtë se Luli. E dëgjova që tha para ca ditësh: “Elbasani është një shesh xhirimi natyral”. Tani bënte edhe si aktor. E di që dhe ai nuk fiton, por që bën edhe kontrata. Gjithë ai zdap, Luçi dhe me një ekran nga Bari dhe flet për 400 milionë” – tha Rama.
Boçi shkruan se Rama u kthye sot në skenën e krimit duke u tallur me qytetarët e varfër të Elbasanit. Kandidati i koalicionit Bashkë Fitojmë për 14 majin shtoi gjithashtu se Rama flet për gara me makina e motorpark në një qark ku 16 mijë familjë trajtohen me ndihmë ekonomike në qarkun e dytë më të varfër.
Boçi shtoi më tej se Rama e ka marrë sot mesazhin e parë të braktisjes dhe se me 14 maj do marrë përgjigjen e duhur nga elbasanllijnjtë.
“Edi Rama u rikthye sërish në skenën e krimit të tij!
Ndërkohë që takohesha dhe ndaja pritshmëri tërësisht pozitive me bashkëqytetarë të mi elbasanas në Selanik dhe Athinë të Greqisë, të cilët do të vijnë në 14 maj për të votuar ndryshimin, bashkëpunëtorët më informuan për vizitën e Edi Ramës në Elbasan, apo në vendin e krimit të tij politik.
Erdhi në qarkun e dytë më të varfër të Shqipërisë. Nuk kërkoi ndjesë. U tall sërish. U foli qytetarëve të mi për garat e “Formula 1”. Hipokrizi dhe tallje e madhe. U foli për garat me makina njerëzve që janë të sfilitur në garën e tyre të përditshme të mbijetesës falë varfërisë ekstreme.
Foli për Motopark, në qytetin ku 16.000 njerëz trajtohen me ndihmë ekonomike. 16.000 kryefamiljarë marrin para sa për të mbajtur frymën gjallë. Foli pa turp, duke nënqeshur me arrogancë në qytetin me numrin më të madh të personave që janë në paaftësi për të punuar. Foli pa pikë turpi (tamam nje tallava burrë) në qytetin me të ardhurat më të ulëta për banor.
E fshehu pas krahëve të tij kandidatin, njësoj siç e ka fshehur në çdo përballje të hapur publike dhe televizive ku e kam sfiduar të flasim për Elbasanin.
Edi Rama e tejkaloi shiritin e verdhë të vendit të krimit, kur foli për aftësinë e PS për të ndryshuar Elbasanin. Thënë kjo nga një njeri që ka 10 vjet që është në krye të qeverisë dhe nga një forcë që ka 16 vjet që drejton Elbasanin është jo vetëm cinike, por edhe e pafytyrë.
Me sheshin e boshatisur sot në Elbasan, teksa fliste nga Rrapi i Bezistanit, Edi Rama e mori mesazhin e parë të braktisjes. Paratë e tij për të blerë vota, mbështetje, kohë televizive, rrjete sociale dhe gjithçka tjetër këtë herë do të shkojnë dëm.
Ta kam thënë në Parlament në sy të gjithë shqiptarëve: Në 14 maj unë dhe elbasanllinjtë e mi do ta bajmë ndryshimin!
Dhe atë punën e gjatësisë mos e përmend më…
Ti je shembulli tipik sesi një njeri shtatlartë është moralisht një krijesë tmerrësisht e ulët…” – shkruan Boçi.
