Prezantuesi i CNN, Don Lemon, ka sulmuar rrjetin pas shkarkimit, që erdhi pas akuzave për mizogjini dhe sjellje të pahijshme.
“Jam i habitur”, shkroi Lemon në Twitter, duke thënë se agjenti i tij i tha se duhet të largohej.
CNN tha se ishte shkëputur nga marrëdhënia me Lemon duke i uruar suksese të mëtejshme.
Ai pason komentet e Lemon, ku gazetari tha se republikania Nikki Haley, 51 vjeçe, nuk ishte ‘në kulmin e saj’.
Shkarkimi vjen gjithashtu pas një tjetër largimi të madh të medias amerikane. Më herët, Fox News njoftoi se po ndahej me prezantuesin Tucker Carlson.
Pjesë e rrjetit prej shumë kohësh, Lemon ishte së fundmi bashkëprezantues i programit ‘This Morning’ të CNN.
Por ai u përball me kritika në fillim të këtij viti pas komenteve që bëri për kandidaten republikane për president Nikki Haley, një ish-ambasadore e OKB-së dhe guvernatore e Karolinës së Jugut.
Haley nuk ishte ‘në kulmin e saj’, tha Lemon në shkurt, një vërejtje që u dënua gjerësisht si seksiste.
“Kur konsiderohet një grua të jetë në kulmin e saj, në të 20-at, 30-at dhe ndoshta të 40-at e saj,” tha ai.
“Unë thjesht po them se cilat janë faktet, shihini në Google” shtoi ai, në përgjigje të kundërshtimeve nga bashkëprezantueset e tij femra, Poppy Harloë dhe Kaitlan Collins.
Lemon lëshoi një deklaratë në të njëjtën ditë duke thënë se i vinte keq për komentet e tij ‘të parëndësishme’. Ai gjithashtu kërkoi falje në redaksi dhe pranoi të merrte pjesë në ‘stërvitjen e detyrueshme’ për të adresuar incidentin.
Në një postim në Tëitter të hënën, Haley u shfaq duke komentuar shkarkimin e Lemon, duke e quajtur atë një ‘ditë të shkëlqyer për gratë kudo’.
Lemon gjithashtu është përballur me polemika vjeshtën e kaluar teksa tha se ekipi i futbollit amerikan për meshkuj duhet të paguhet më shumë se ai i femrave, duke thënë se meshkujt ishin ‘më interesantë për t’u parë’.
57-vjeçari ishte shfaqur në CNN të hënën gjatë programit të mëngjesit si zakonisht, përpara se raportet për shkarkimin e tij të publikoheshin më vonë atë ditë.
“Pas 17 vitesh në CNN do kisha menduar se dikush nga drejtuesit do kishte pasur mirësjelljen të ma thoshte drejtpërdrejt”, shkroi Lemon në Twitter.
“Në asnjë moment nuk më është dhënë asnjë tregues se nuk do mund të vazhdoja të bëja punën që kam dashur në rrjet.”
Ai vazhdoi: “Është e qartë se ka çështje më të mëdha në lojë”.
Rrjeti nuk dha hollësi mbi arsyen e shkarkimit të tij. Por në një deklaratë të dytë të lëshuar pasditen e së hënës, ajo e quajti përshkrimin e ngjarjeve nga Lemon si ‘të pasaktë’, duke thënë se atij i ishte dhënë një mundësi për t’u takuar me drejtuesit.
Lemon ka punësuar avokatin Bryan Freedman për të adresuar kontratën e tij me CNN, e cila do zgjaste deri në vitin 2026, raportoi New York Times, duke cituar burime të njohura me marrëveshjen.
CNN This Morning do vazhdojë me ish-bashkëprezantueset e Lemon, znj. Harloë dhe znj. Collins, tha rrjeti.
Lemon erdhi në CNN në 2006 pasi punoi për një stacion lokal NBC në Çikago. Për më shumë se tetë vjet, ai drejtoi shfaqjen kryesore ‘Don Lemon Tonight’. Ai u largua për të ndihmuar në nisjen e emisionit CNN This Morning nëntorin e kaluar së bashku me Harloë dhe Collins.
Pas komenteve të Lemon për Nikki Haley, producentët e CNN zbuluan se të ftuarit nuk donin të shfaqeshin në shfaqje me Lemon, raportoi New York Times.
Në një postim në faqen e tij të mediave sociale Truth Social të hënën, ish-presidenti Donald Trump iu referua Lemonit si ‘njeriu më budalla në televizion’.
Ai nuk komentoi shkarkimin e Tucker Carlson.
VINI RE: Ky material është pronësi intelektuale e BBC
Përgatiti për Hashtag.al, K,Manjani
