Presidenti kinez Xi Jinping dhe homologu i tij ukrainas, Vladimir Zelensky, kanë folur në telefon, në bisedën e tyre të parë zyrtare që kur Rusia sulmoi shtetin fqinj në shkurt 2022. Xi i tha Zelensky-t se ‘bisedimet dhe negociatat janë e vetmja rrugëdalje e mundshme’.
“Kina as nuk do ta shikojë zjarrin nga ana tjetër, as nuk do t’i shtojë benzinë zjarrit, e lëre më të përfitojë nga mundësia për të fituar,” tha Xi, cituar nga Global Times. Presidenti kinez u bëri thirrje të gjitha palëve të qëndrojnë ‘të qeta e të përmbajtura’ kur bisedojnë teksa ekziston rreziku që lufta të kthehet në një përplasje më të madhe.
“Askush nuk e fiton një luftë bërthamore,” tha ai, shkruan NBC.
Zelensky shkroi në Twitter se dialogu ishte ‘i gjatë dhe kuptimplotë’. Ai tha se thirrja, së bashku me emërimin e një ambasadori në Kinë, ‘do i japë një shtysë të fuqishme zhvillimit të marrëdhënieve tona dypalëshe’.
Xi premtoi të dërgojë ‘një të dërguar të posaçëm’ në Ukrainë dhe vende të tjera për të ‘kryer komunikim të thellë’ në lidhje me zgjidhjen e konfliktit.
Në shkurt, Pekini zbuloi një udhërrëfyes prej 12 pikash për paqen midis Moskës dhe Kievit, duke shprehur gatishmërinë për të marrë pjesë në ndërmjetësimin për t’i dhënë fund armiqësive. Kina, ndryshe nga shumë vende perëndimore, ka kundërshtuar ta dënojë Rusinë dhe të vendosë sanksione ndaj Moskës.
Xi udhëtoi për në Moskë muajin e kaluar, ku u takua me presidentin rus Vladimir Putin. Udhëheqësit u zotuan të punojnë për të rritur tregtinë dhe fusha të tjera të bashkëpunimit. Sipas Ministrisë së Jashtme kineze, Xi tha se lidhjet midis dy vendeve kanë ‘fituar një rëndësi kritike për peizazhin global dhe të ardhmen e njerëzimit’.
