Kandidati i koalicionit “Bashkë fitojmë” për kryetar të Bashkisë së Vorës Indrit Hoxha në një mesazh drejtuar votuesve, thekson se është e rëndësishme që Vora të fitojë një identitet, nuk mund të jetë një transit dhe se beteja për Vorën është beteja për ligjin, për qytetarinë, për anti-korrupsionin dhe anti-krimin.
Hoxha thotë se kandidimin për Vorën e ka marrë si mision për disa arsye që ai i rendit në statusin e tij, duke e cilësuar së pari si nyjë ekonomike midis aksit Tiranë-Durrës.
MESAZHI I KANDIDATIT TË “BF” INDRIT HOXHA
Beteja për Vorën, beteja për ligjin, për qytetarinë, për anti-korrupsionin dhe anti-krimin
Në zgjedhjet e 14 majit kandidoj për zgjedhjet për kryetar për bashkinë e Vorës, me një përgjegjësi qytetare për të marrë përsipër zonën më të vështirë nga pikëpamja e intensitetit të përqendrimit të korrupsionit dhe gjithçkaje të paligjshme që mund të imagjinohet në regjimin e Edi Ramës. Mjafton t’ju përmend një fakt, të paktën tre kryetarë bashkie pararendës të rilindjes në këtë qytet, që nga viti 2019 janë ose me probleme formale ligjore ose me tërheqje të nënkuptuara për shkak të korrupsionit, problemeve me ligjin ose çështje të tjera edhe më të rënda.
Kandidimin në bashkinë e Vorës e kam marrë si një mision që kur mu propozua, sepse në këtë qytet është e nevojshme të bëhet një luftë simbol për të paktën tre arsye:
Së pari, Vora megjithëse ka një territor të vogël, është nyja ekonomike e aksit Tiranë-Durrës dhe të gjithë zonës më të shëndetshme ekonomike të Shqipërisë. Aty janë të përqendruara qindra biznese nga më të mëdhenjtë dhe kjo shihet dhe në buxhetin e bashkisë që i kalon 80 milion euro. Pikërisht për shkak të të këtij pozicioni, midis dy zonave më të shëndetshme ekonomike, Tirana dhe Durrësi, në Vorë janë përqendruar bandat dhe flukset e ekonomive të paligjshme më të mëdha, të cilat për territor do të përbënin një rekord. Sigurisht qytetet e mëdha gjatë rilindjes kanë akumuluar një fluks paligjshmërie dhe krimi të madh, por pjesëtuar me sipërfaqen Vora këtë intensitet e ka më të lartë.
Së dyti, kam marrë guximin qytetar, personal dhe fizik për të përfaqësuar Partinë Demokratike dhe opozitën reale në këtë garë, edhe për një arsye tjetër: Shumëkush do të ndjehej i frikësuar, i intimiduar, i shantazhuar nga ky përqendrim i krimit, nga ky intensitet kriminal në këtë zonë për arsye të kuptueshme dhe arsye njerëzore. Duke i dalë ballë kësaj situate unë dua të inkurajoj çdo demokrat, çdo qytetar të lirë dhe të paangazhuar, madje dhe çdo të majtë të zhgënjyer që të jenë guxim plotë, që vota e tyre do të numërohet, vota e tyre do të llogaritet dhe vota e tyre nuk do të ketë asnjë firo për asnjë lloj arsye. Ne duhet t’i japim një mesazh krimit, ne duhet ta shpërthejmë omerta-në që ka vendosur pushteti dhe krimi në bashkinë e Vorës në këto 4 vitet e fundit.
Së treti, është e rëndësishme që Vora të fitojë një identitet, ai nuk mund të jetë një transit, ajo nuk mund te jetë një stacion benzine apo një stacion ku ndërtohen trenat. Duhet të jetë një qytetet apo një identitet i çliruar nga kthetrat e krimit dhe të paligjshmërisë. Duhet të formësojë hapësirën e vet urbane, duhet të formësojë identitetin, duhet të formësojë pamjen e saj, duhet të zhvillohet dhe të mos jetë e kufizuar me një autostradë përsipër, por të ketë planin e vet të zhvillimit. Janë pikërisht interesat ekonomike dhe kriminale që e mbajnë sot Vorën si një periferi urbane të Tiranës apo të Durrësit, ku zotëron krimi, korrupsioni, paligjshmëria dhe mungesa e zhvillimi në mes të një pasurie përrallore, që ka gjeografikisht dhe ekonomikisht Vora, e vendosur në aksin më të zhvilluar të Shqipërisë, Tiranë- Durrës
