Kreu i Partisë Republiakne Fatmir Mediu dhe kryetari i Partisë Agrare Ambjentaliste Agron Duka kanë zhvilluar një takim pune me këshilltarët e partive të opozitës dhe kandidatin e opozitës për Kamzën Arjan Hoxha.
Mediu theksoi se pavarësisht presionit të qeverisë, duhet luftuar që çdo qytetar të votojë dhe t’i mbrohet vota.
“Pavarësisht presionit të qeverisë Ne duhet të luftojmë që çdo qytetarë të votojë dhe t’i mbrojmë votën dhe këtë duhet ta bëjmë të gjithë bashkë. Sot është në pikëpyetje e ardhmja e vendit dhe pluralizmi politik”, tha Mediu.
Duka po ashtu theksoi se Arjan Hoxha nuk është kandidat vetëm i “Bashkë Fitojmë”, por i gjithë opozitës.
“Ne nuk mund të lejojmë që ky vend të shkatërrohet dhe kontrollohet nga një njeri i vetëm. Ky pushtet po shkatërron Shqipërinë”, tha Duka.
Kandidati Hoxha tha se Kamza është e fituar por kërkohet nga të gjithë të punojmë bashkë dhe të jemi një ekip sot dhe nesër.
