Një zjarr shpërtheu në një minierë ari në Perunë jugore dhe vrau të paktën 27 punëtorë gjatë turnit të natës, njoftuan autoritetet peruane.
Kompania e minierave Yanaquihua tha në një deklaratë se 175 punëtorë ishin evakuuar në mënyrë të sigurtë pas aksidentit, i cili ndodhi vonë të premten ose herët të shtunën. Ai tha se 27 të vdekurit punonin për një kontraktor që është i specializuar në miniera.
Zyrtarët qeveritarë thanë se shkaku i zjarrit është nën hetim. Disa raporte të lajmeve thanë se hetimet paraprake treguan se një shpërthim mund të ishte shkaktuar nga një qark i shkurtër në një pjesë të minierës rreth 100 metra nën sipërfaqe.
Të afërmit e viktimave u sollën me autobusë në minierën në Yanaquihua në rajonin e Arequipa, ku u informuan nga agjentët e sigurisë. Disa u ulën para hyrjes së minierës për të pritur trupat e të dashurve të tyre.
Marcelina Aguirre tha se burri i saj ishte në mesin e të vdekurve. Ajo tha se ai i kishte thënë se kishte rreziqe në minierë.
“Jam shumë e shqetësuar, shumë e pikëlluar që humba bashkëshortin, duke lënë dy fëmijë të braktisur,” tha ajo.
Ministria Publike e Distriktit Arequipa tha se hetuesit po punonin për të sqaruar se çfarë ndodhi.
“Gjatë hetimeve, Prokuroria do të përcaktojë shkakun e ngjarjes tragjike dhe përgjegjësitë e të përfshirëve”, thuhet në deklaratën e saj.
