Sipas firmës shumëkombëshe të udhëtimeve TUI Group, pazaret e minutës së fundit dhe tarifat e lira të avionit janë një gjë e së kaluarës.
Në një intervistë me gazetën gjermane Bild am Sonntag, shefi i kompanisë Sebastian Ebel tha se çmimet e larta të karburantit, së bashku me kërkesën që tejkalon ofertën, i kanë bërë udhëtimet e pushimeve më të shtrenjta, veçanërisht në udhëtimet në largësi të gjata.
“Në vitin 2023 nuk do ketë ‘verë të minutës së fundit’ si dikur. Përkundrazi: pak para nisjes, çmimet do të priren të jenë më të larta, sepse hotelierët dhe linjat ajrore e dinë se ka ende shumë rezervime në një njoftim të shkurtër. Pazaret spontane do të jenë përjashtim absolut. Rezervimi i hershëm jep zgjedhje dhe çmime të mira,” shpjegoi Ebel.
Fluturimet e lira për më pak se 50 euro nuk do ekzistojnë më, shtoi ai.
Sipas të dhënave të publikuara në mars në Mbretërinë e Bashkuar, shuma e shpenzuar për pushime dhe udhëtime ajrore u rrit përkatësisht 19% dhe 34%, nga një vit më parë.
Verën e kaluar, çmimi i karburantit të avionëve u rrit në më shumë se 175 dollarë për fuçi mes krizës më të gjerë energjetike. Kostot e karburantit të avionëve janë ulur që atëherë në përputhje me çmimet e naftës së papërpunuar, por ato mbeten ende mbi mesataren e saj afatgjatë.
Trafiku ajror do rritet në nivelet para pandemisë në shumicën e rrugëve këtë vit, tha në shkurt agjencia e aviacionit të Kombeve të Bashkuara, pasi shumica e kufizimeve të udhëtimit të lidhura me pandeminë Covid-19 janë hequr globalisht.
Me seli në Hanover, TUI Group është një nga kompanitë më të mëdha turistike në botë, që punëson 60,000 njerëz dhe ofron udhëtime në 180 destinacione.
