Një foshnjë ka lindur me ADN-në e tre personave për herë të parë në Mbretërinë e Bashkuar, pas përdorimit të një forme pioniere të fekondimit in vitro (IVF) – nganjëherë referuar si një teknikë e ‘foshnjave me epruvetë’. Lajmi është konfirmuar nga rregullatori britanik i fertilitetit, raportoi gazeta The Guardian të martën.
Publikimi, i cili thotë se e ka marrë lajmin përmes një kërkese për lirinë e informacionit, nuk ka mundur të publikojë të dhëna më specifike si, kur ka lindur fëmija dhe gjendjen e tij shëndetësore, për arsye të konfidencialitetit mjekësor.
Procedura, e cila njihet si trajtimi i dhurimit mitokondrial (MDT), kombinon indet nga vezët e një dhurueseje femër për të krijuar embrione IVF pa sëmundje të trashëguara që potencialisht do t’i kalonin një fëmije gjatë një shtatzënie konvencionale.
Këto embrione kombinohen me spermatozoidet dhe vezët e prindërve biologjikë, dhe foshnja që lind përmban nënshkrimet e ADN-së së tre personave – prindërve të saj dhe dhurueses femër.
Prindërit biologjikë kontribuojnë më shumë se 99.8% të ADN-së së foshnjës, e cila kontrollon karakteristikat kryesore si personaliteti, si dhe ngjyra e syve dhe flokëve. Rreth 37 gjene mund të gjurmohen drejtpërdrejt te dhuruesi.
“MDT u ofron familjeve me sëmundje të rëndë të trashëguar mitokondriale mundësinë e një fëmije të shëndetshëm”, tha për The Guardian, Peter Thompson nga rregullatori i fertilitetit në Mbretërinë e Bashkuar, ‘Human Fertilization and Embriology Authority (HFEA)’.
HFEA shtoi në raportin e The Guardian se ‘më pak se pesë’ foshnja deri më tani kanë lindur duke përdorur procedurën. Lindja e parë e njohur MDT ndodhi në SHBA në vitin 2016.
Në vitin 2015, Mbretëria e Bashkuar u bë vendi i parë që miratoi përdorimin e MDT pas një votimi në Dhomën e Komunëve.
Kjo erdhi në mes të një debati të ashpër etik të udhëhequr nga disa politikanë dhe grupe fetare në lidhje me etikën e procedurave mjekësore që prodhojnë të ashtuquajturat ‘foshnja projektuese’. Procedura gjithashtu shkaktoi pretendime se foshnjat lindnin me ‘tre prindër’. Rastet e para MDT u autorizuan në MB në 2018.
Kryeministri i atëhershëm David Cameron adresoi shqetësimet në kohën pas votimit për miratimin e trajtimit, duke thënë se ‘ne nuk po sillemi si Zoti këtu, ne thjesht po sigurohemi që dy prindër që duan një fëmijë të shëndetshëm mund të kenë një të tillë’.
