Gjykata e Lartë e Pakistanit ka urdhëruar lirimin e ish-kryeministrit Imran Khan, arrestimi i të cilit në fillim të kësaj jave shkaktoi protesta tw mwdha në gjithë vendin, ka raportuar kanali i lajmeve Geo TV.
Gjykata shqyrtoi një apel nga ekipi ligjor i Khan të enjten, duke vendosur se arrestimi i figurës së opozitës ishte i paligjshëm, sipas medias.
Udhëheqësi i partisë së Pakistanit Tehreek-e-Insaf (PTI) u arrestua me urdhër të Byrosë Kombëtare të Përgjegjshmërisë (NAB) të martën sapo mbërriti në një gjykatë më të ulët në lidhje me një çështje korrupsioni kundër tij. Ai u mbajt në një kompleks policie në kryeqytet, Islamabad.
Zëdhënësi i Khan tha për Al Jazeera se 70-vjeçari u kap në gjykatë para se të dilte para gjykatësve, gjë që ishte ‘në shkelje të të gjitha ligjeve’. Partia PTI pretendoi se nuk ishte një arrestim, por një ‘rrëmbim’ dhe u bëri thirrje mbështetësve të saj të dilnin në rrugë.
Pakistani është përfshirë nga protesta të dhunshme për tre ditët e fundit, me demonstruesit që u përleshën me forcat e sigurisë dhe u vunë flakën ndërtesave qeveritare në qytetet kryesore anembanë vendit. Qeveria e kryeministrit Shehbaz Sharif ka vendosur ushtrinë në një përpjekje për të frenuar trazirat.
Rreth 2,500 nga mbështetësit e Khan, duke përfshirë disa figura të larta në partinë e tij, janë arrestuar deri më tani. Mediat vendase kanë raportuar për të paktën 11 protestues të vrarë dhe qindra policë të plagosur.
Kundër Khan janë nisur një sërë çështjesh penale që nga largimi i tij nga detyra pas një votimi mosbesimi në prill 2022. Lideri i PTI-së, i cili mbetet shumë popullor në vend, mohon të gjitha akuzat kundër tij.
Politikani pretendoi një vit më parë se ai ishte rrëzuar si rezultat i një ‘komploti ndërkombëtar’ të udhëhequr nga SHBA-ja dhe akuzoi kundërshtarët e tij për marrjen e parave nga forcat e huaja.
Khan ka bërë përpjekje aktive për t’u kthyer në pushtet që atëherë, duke organizuar mitingje masive në të gjithë vendin. Ish-kryeministri i mbijetoi një atentati nëntorin e kaluar, duke shpëtuar me një plagë në këmbë , pasi disa plumba u qëlluan në drejtim të tij.
