Presidenti i Ukrainës Volodymyr Zelensky po viziton Romën, ku po takohet me liderët politikë përpara një audiencë me Papa Françeskun, sipas BBC.
“Një vizitë e rëndësishme për afrimin e fitores së Ukrainës!” shkroi në Twitter teksa zbarkoi në kryeqytetin italian.
Ai u takua me kryeministrin italian Giorgia Meloni dhe presidentin Sergio Mattarella dhe do të niset për në Vatikan më vonë të shtunën.
Një operacion i madh sigurie është nisur, me më shumë se 1000 policë të vendosur dhe një zonë ndalim-fluturimi mbi Romë.
Presidenti Zelensky zhvilloi një takim privat me homologun e tij Presidentin Mattarella, më pas u takua me kryeministren Meloni për një drekë pune.
Italia historikisht ka lidhje të forta me Moskën.
Silvio Berlusconi, lideri i partisë konservatore Forza Italia, është një mik i vjetër i presidentit rus Vladimir Putin. Ata shkuan në udhëtime së bashku dhe shkëmbyen dhuratat e ditëlindjes.
Matteo Salvini, zëvendëskryeministri, ka shprehur shpesh ndjenja pro-ruse dhe ka kritikuar ndihmën ushtarake për Ukrainën. Presidenti Zelensky nuk pritet të takojë as Salvinin dhe as Berluskonin gjatë udhëtimit të tij.
Papa Françesku ka thënë shpesh se Vatikani është i gatshëm të veprojë si ndërmjetës në konfliktin mes Rusisë dhe Ukrainës.
Në fillim të këtij muaji, ai deklaroi se Vatikani po punonte për një plan paqeje për t’i dhënë fund luftës, duke thënë se misioni “nuk është ende publik. Kur të jetë publik, unë do të flas për të”.
Por marrëdhënia midis Ukrainës dhe Vatikanit ka qenë ndonjëherë e pakëndshme.
Gushtin e kaluar, ambasadori i Ukrainës në Vatikan ndërmori hapin e pazakontë duke kritikuar Papën pasi Papa iu referua Darya Dugina-s, vajzës së një figure ultra-nacionaliste ruse, e cila u vra nga një makinë bombë, si një viktimë “e pafajshme” e luftës. .
Të shtunën do të jetë hera e parë që presidenti Zelensky dhe Papa Françesku takohen që kur Rusia pushtoi Ukrainën. Dyshja u takuan në vitin 2020.
Ndërkohë, qeveria gjermane zbuloi paketën e saj më të madhe të ndihmës ushtarake për Ukrainën, me vlerë 2.7 miliardë euro (2.4 miliardë paund). Mykhailo Podolyak, një këshilltar i Presidentit Zelensky, tha se ndihma tregonte se Rusia “është e detyruar të humbasë dhe të ulet në stolin e turpit historik”.
Në fillim të kësaj jave, media gjermane raportoi se Presidenti Zelensky po planifikonte të vizitonte Gjermaninë pas udhëtimit të tij në Itali, megjithëse kjo ende nuk është konfirmuar.
