Presidenti sirian Bashar al-Assad u prit ngrohtësisht në një samit arab të premten, duke u përqafuar nga Princi i Kurorës së Arabisë Saudite në një takim të liderëve që e kishin shmangur atë për vite me radhë, në një ndryshim rë politikës që kundërshtohet nga SHBA-ja e fuqitë e tjera perëndimore.
Princi i kurorës saudite, Mohammed bin Salman, shtrëngoi duart me Asadin e gëzuar, ndërsa samiti po zhvillohej në Jeddah, duke e kthyer faqen e armiqësisë ndaj një lideri që mori mbështetjen e Iranit dhe Rusisë për të mposhtur armiqtë e tij në luftën civile të Sirisë.
Samiti shfaqi përpjekjet e dyfishuara të Arabisë Saudite për të ushtruar ndikim në skenën globale, me presidentin ukrainas Volodymyr Zelenskiy të pranishëm dhe Princin e Kurorës Mohammed që ritheksoi gatishmërinë e Riadit për të ndërmjetësuar në luftën me Rusinë.
Superfuqia e naftës, Arabia Saudite, dikur e ndikuar shumë nga Shtetet e Bashkuara, ka marrë drejtimin diplomatik në botën arabe vitin e kaluar, duke rivendosur lidhjet me Iranin, duke mirëpritur Sirinë përsëri në vathë dhe duke ndërmjetësuar në konfliktin e Sudanit.
Me shumë shtete arabe që shpresojnë se Assad tani do ndërmarrë hapa për të larguar Sirinë nga Irani shiit, Assad tha se ‘e kaluara, e tashmja dhe e ardhmja e vendit është arabizmi’, por pa përmendur Teheranin – që ka qenë për dekada një aleat i ngushtë sirian.
Në një goditje të dukshme ndaj presidentit turk Erdogan, i cili ka mbështetur rebelët sirianë dhe ka dërguar forcat turke në zonat e Sirisë veriore, Assad vuri në dukje ‘rrezikun e mendimit ekspansionist osman’, duke e përshkruar atë si të ndikuar nga Vëllazëria Myslimane – një grup islamik që shihet si një armik i Damaskut dhe shumë shteteve të tjera arabe, shkruan Reuters.
Princi i kurorës Mohammed tha se shpresonte se ‘kthimi i Sirisë në Ligën Arabe do të çojë në fundin e krizës së saj’, 12 vjet pasi shtetet arabe pezulluan Sirinë ndërsa ajo u fut në një luftë civile ku janë vrarë më shumë se 350,000 njerëz.
Arabia Saudite ‘nuk do lejojë që rajoni ynë të kthehet në një fushë konfliktesh’, tha ai, duke thënë se faqja ishte kthyer në ‘vite të dhimbshme lufte’.
Uashingtoni ka kundërshtuar çdo hap drejt normalizimit me Asadin, duke thënë se së pari duhet të ketë përparim drejt një zgjidhjeje politike të konfliktit.
“Amerikanët janë të tronditur. Ne shtetet e Gjirit jemi njerëz që jetojmë në këtë rajon, ne po përpiqemi t’i zgjidhim problemet tona sa më shumë që të mundemi me mjetet që kemi në dispozicion në duart tona,” tha një burim i Gjirit pranë qarqeve qeveritare.
Një analist i Gjirit i tha Reuters se Siria rrezikonte të bëhej një degë e Iranit dhe pyeti: “A duam që Siria të jetë më pak arabe dhe më iraniane, apo…të kthehet në krahun arab?”
Pasi e mirëpritën Assadin, shtetet arabe gjithashtu duan që ai të frenojë një tregti të lulëzuar siriane të narkotikëve, të cilat prodhohen në Siri dhe kontrabandohen në të gjithë rajonin.
