Ushtria ukrainase dhe ushtria private e Rusisë ‘Wagner’ raportuan të dyja tërheqje të mëtejshme ruse rreth qytetit Bakhmut të enjten, ndërsa Kievi vazhdoi me përparimin e tij më të madh në gjashtë muaj përpara një kundërofensivë të planifikuar.
Trupat ukrainase pranë vijës së frontit thanë se Rusia po bombardonte rrugët e hyrjes për të ngadalësuar sulmin ukrainas, i cili ka ndryshuar vrullin pas disa muajsh arritjesh të ngadalta ruse në luftimet tokësore më vdekjeprurëse të Evropës që nga Lufta e Dytë Botërore.
“Tani, në pjesën më të madhe, ndërsa kemi filluar të përparojmë, ata po bombardojnë të gjitha rrugët për në pozicionet e përparme.” – tha Petro Podaru, komandant i një njësie artilerie ukrainase.
Ushtria e Ukrainës tha se trupat kishin përparuar në vende me më shumë se 1.7 kilometra. Forcat e saj kishin qenë në mbrojtje për gjysmë viti, duke përballuar një ofensivë të madhe nga Moska që pa vetëm përparime të ngadalta.
“Pavarësisht faktit se njësitë tona nuk kanë një përparësi në pajisje dhe personel, ato kanë vazhduar të përparojnë në krahë dhe kanë kaluar një largësi prej 150 deri në 1700 metrash.” – tha zëdhënësi ushtarak Serhiy Cherevatyi në komentet televizive.
Shefi i Wagner-it, Yevgeny Prigozhin thotë se forcat e tij brenda Bakhmutit janë ende duke përparuar, në prag të shtyrjes së trupave ukrainase nga baza e tyre e fundit në zonën e ndërtuar në periferinë perëndimore të qytetit.
Por ai akuzon komandantët e forcave të rregullta ruse se kanë braktisur tokën në veri dhe në jug të qytetit, duke rritur rrezikun e rrethimit të trupave brenda.
“Fatkeqësisht, njësitë e Ministrisë së Mbrojtjes Ruse janë tërhequr deri në 570 metra në veri të Bakhmut, duke ekspozuar krahët tanë”, tha Prigozhin në mesazhin e tij të fundit zanor të enjten.
“Unë i bëj thirrje udhëheqjes së lartë të Ministrisë së Mbrojtjes, publikisht, sepse letrat e mia nuk po lexohen,” tha Prigozhin, duke iu drejtuar ministrit të Mbrojtjes Sergei Shoigu dhe shefit të Shtabit të Përgjithshëm Valery Gerasimov.
