I zhytur në mitologji dhe jetë të veçantë bimore, Socotra është padyshim ndër vendet më unike në planet. Fatkeqësisht, ky ishull me peizazhe të bukura natyrore është përballur me kohë të vështira pasi është përfshirë në luftën civile të rrëmujshme të Jemenit, një nga krizat më të këqija humanitare të globit.
Socotra ndodhet në Oqeanin Indian rreth 340 kilometra nga brigjet e Jemenit, jo shumë larg majës së Somalisë në grykën e Gjirit të Adenit. Është teknikisht një arkipelag i përbërë nga katër ishuj, Socotra është më i madhi mes tyre.
Ishulli është i njohur për larmishmërinë unike që përfshin shumë specie që nuk gjenden askund tjetër në planetin Tokë. Sipas UNESCO-s, 37% e 825 llojeve bimore të Socotra, 90 për qind e specieve të saj të zvarranikëve dhe 95 për qind e specieve të kërmillit të saj tokësor nuk gjenden askund tjetër në botë.
Një nga speciet më ikonike që gjendet këtu është Pema e Gjakut të Dragoit, një pemë me pamje të pazakontë që mori emrin e saj sepse nxjerr lëngun e kuq si gjak nga trungu.
Disa besojnë se Kaini dhe Abeli lindën në Sokotra pasi prindërit e tyre, Adami dhe Eva, u dëbuan nga Kopshti i Edenit. Sipas folklorit vendas, Pema e Gjakut të Dragoit u shfaq kur Kaini kreu vrasjen e parë në botë kundër vëllait të tij Abelit, duke derdhur gjakun e tij në tokë dhe duke e lejuar pemën të rritej.
Një studim i vitit 2007 parashikoi se numri i Pemëve të Gjakut të Dragoit mund të bjerë pothuajse përgjysmë brenda këtij shekulli si rezultat i tharjes së ishullit, shkruan IFL.
Pema e Gjakut të Dragoit njihet si Dam al-Akhaëain në arabisht, që përkthehet ‘gjaku i dy vëllezërve’ Edhe vetë emri i Socotra-s thuhet se rrjedh nga arabishtja ‘suqs qutra’, që do të thotë ‘tregu i gjakut të dragoit’.
Për shkak të bukurisë së tij natyrore, ishulli njihet ndonjëherë si ‘Xhevahiri i Gjirit të Adenit’ ose ‘Galápagosi i Oqeanit Indian’.
Megjithatë, kjo parajsë idilike është nën kërcënim. Socotra ishte historikisht pjesë e Jemenit, por vitet e fundit ka rënë nën ndikimin e Emirateve të Bashkuara Arabe (EBA).
Në vitin 2018, Emiratet e Bashkuara Arabe vendosën forca ushtarake në ishull si pjesë e ndërhyrjes së vazhdueshme të udhëhequr nga Arabia Saudite në Luftën Civile të Jemenit. Ndërsa nuk pati përplasje me armë, frocat e Emirateve kishin pushtuar në mënyrë efektive ishullin dhe kishin vendosur kontrollin politik.
Emiratet e Bashkuara Arabe u akuzuan për planifikimin e shndërrimit të ishullit në një ‘bazë të përhershme ushtarake’. Kritikët pohuan gjithashtu se Emiratet po përpiqeshin të kontrabandonin bimë dhe kafshë të mbrojtura nga ishulli për qëllimet e tyre. Pas viteve të përplasjeve të ndërlikuara politike, Këshilli Kalimtar Jugor i mbështetur nga Emiratet e Bashkuara Arabe mori komandën e ishullit në vitin 2020.
Pa fund në horizont për krizën e Jemenit, Socotra është bllokuar në mënyrë të vështirë në mes të konfliktit ndërkohë. Megjithatë, ka ende shpresë. Pavarësisht nga problemet me të cilat përballet Socotra dhe pema e saj ikonë e Gjakut të Dragoit, ka ende përpjekje të vazhdueshme konservimi që shpresojnë të ruajnë pasurinë e ishullit për brezat e ardhshëm.
