Spanja rrezikon të qeveriset nga e djathta ekstreme, paralajmëron kryeministri
Kryeministri spanjoll Pedro Sanchez paralajmëroi të mërkurën se një qeveri e politikanëve të ekstremit të djathtë mund të qeverisë së shpejti Spanjën.
Duke folur publikisht për herë të parë që kur thirri zgjedhjet e përgjithshme të parakohshme të hënën, Sanchez tha se spanjollët kanë një zgjedhje midis status quo-së ose ekstremistëve të krahut të djathtë kur të votojnë në fund të korrikut.
Ai tha se krahu i djathtë i Spanjës, i cili doli fitues në zgjedhjet lokale dhe rajonale të dielën, dëshiron të ndalojë investimet në energjinë e rinovueshme, të shkatërrojë mjedisin, të ndryshojë përparimet sociale dhe të ulë mbrojtjen e punëtorëve.
“E djathta ekstreme fitoi dhe ne kemi nevojë për sqarime sepse Spanja përballet me sfida të mëdha. Duhet të sqarojmë nëse spanjollët duan të shkatërrojnë të drejtat; nëse duan një parti socialdemokrate ose një tandem partish të së djathtës ekstreme që kopjojnë metodat që kemi parë në Uashington, Budapest ose Brazil”, tha Sanchez.
Me Spanjën në prag të miratimit të presidencës së rradhës të Këshillit Evropian në korrik, Sanchez argumenton se atij i duhet një mandat i fortë për të ndaluar krahun e djathtë të ‘shkatërrojë imazhin e Spanjës dhe të luftojë kundër interesave tona’.
Në zgjedhjet e së dielës, Partia Popullore kryesore mori shumicën e votave, por në shumë qytete dhe rajone, ajo do të ketë nevojë për mbështetjen e partisë së ekstremit të djathtë Vox për të formuar qeveri. Nëse Vox do kërkojë qeveri koalicioni apo do të mbështesë Partinë Popullore, mbetet për t’u parë.
Udhëheqësit evropianë të djathtë uruan Vox për performancën e tij, duke përfshirë kryeministren italiane Giorgia Meloni dhe kryeministrin hungarez Viktor Orban.
Në fjalimin e tij, Sanchez paralajmëroi se Spanja nuk është imune ndaj ‘valës reaksionare’ që po forcohet në të gjithë Evropën. Por ai e prezantoi veten si lider për të mbajtur Spanjën ‘duke ecur përpara, jo prapa’ për katër vitet e ardhshme.
Ndërkohë, të mërkurën, kreu i Partisë Popullore, Albero Nunez Feijoo u zotua të linte pas politikën përçarëse dhe tha se nuk do të përfshihej në ‘debate që nuk kanë të bëjnë fare me problemet e qytetarëve’.
