Dy persona janë vrarë dhe pesë të tjerë janë plagosur nga të shtënat në një ceremoni diplomimi në Virxhinia.
Të shtënat ishin jashtë Teatrit Altria në Richmond, sipas BBC.
“Ishte padyshim kaos”, tha shefi i policisë së qytetit. “Njerëzit u shpërndanë.”
Një i dyshuar 19-vjeçar ka tentuar të ikë në këmbë por është arrestuar. Ai do të akuzohet për të paktën dy akuza për vrasje të shkallës së dytë, tha policia.
I dyshuari, emri i të cilit nuk bëhet i ditur, besohet se ka njohur të paktën njërën nga viktimat. Policia nuk ka qëlluar me armë në momentin e kapjes së tij dhe nga vendi i ngjarjes janë sekuestruar disa armë.
Identiteti i viktimave nuk është bërë i ditur, por policia tha se dy personat e vrarë ishin një 18-vjeçar që ishte pjesë e klasës së maturantëve dhe babai i tij 36-vjeçar.
Një 31-vjeçar i qëlluar me armë zjarri ka pësuar lëndime të rrezikshme për jetën dhe ndodhet në gjendje kritike për jetën. Katër meshkuj të moshës 14, 32, 55 dhe 58 vjeç kanë mbetur të plagosur, por janë në gjendje të qëndrueshme.
Personi i armatosur hapi zjarr në Monroe Park, i cili ndodhet drejtpërdrejt përballë teatrit, pak pasi ceremonia për shkollën e mesme Huguenot kishte përfunduar rreth orës 17:15 (21:15 GMT).
Familjet dhe të diplomuarit po largoheshin nga teatri, i cili është afër kampusit të Universitetit të Commonwealth të Virxhinias, kur u dëgjuan të paktën tetë të shtëna.
Njerëzit vrapuan për të shpëtuar, disa mbanin fëmijë të vegjël dhe foshnja, ndërsa të tjerët kërkuan strehim në ndërtesat aty pranë. Maturantët u përqafuan dhe qanë kur u ribashkuan pas sulmit.
Përveç atyre që u qëlluan, policia tha se 12 persona të tjerë u plagosën në nxitim ose u trajtuan për ankth për shkak të kaosit.
“Kjo duhet të kishte qenë një hapësirë e sigurt. Njerëzit duhet të ishin ndjerë të sigurt në një diplomim,” tha shefi i përkohshëm i policisë Richmond Rick Edwards në një konferencë shtypi.
“Është tepër tragjike që dikush vendosi të sjellë një armë në këtë incident dhe të bjerë tmerri mbi komunitetin tonë”, tha ai.
Mbikëqyrësi i Shkollave Publike në Richmond, Jason Kamras tha se sulmi ndodhi në atë që “supozohej të ishte një ditë e gëzueshme kur fëmijët tanë dalin në skenë dhe marrin diplomën”.
“Nuk kam më fjalë për këtë, jam lodhur duke parë që njerëzit të qëllohen, fëmijët tanë të qëllohen dhe i lutem të gjithë komunitetit të ndalojë”, tha ai.
