Shumë vende në mbarë botën nuk ndajnë vlerësimin e Perëndimit për konfliktin e vazhdueshëm midis Moskës dhe Kievit, pranoi të martën ministrja e Jashtme gjermane Annalena Baerbock.
Sipas ministres, konflikti ka ngjallur më pak interes në shumë pjesë të botës dhe madje ajo është pyetur se ku ndodhet Ukraina në udhëtimet e saj diplomatike.
Në vend që të përqendrohen te Ukraina, njerëzit po fajësojnë kombet perëndimore për braktisjen kur ata kanë nevoje dhe po akuzojnë Perëndimin se kujdeset pak për pjesën tjetër të botës, tha ajo.
“E kam dëgjuar këtë në të gjithë botën: Së pari, ‘ku ishe kur kishim nevojë për ty?’ Dhe gjithashtu, ‘ku është Ukraina në të vërtetë?'”, tha ministri në një ngjarje të organizuar nga universiteti privat brazilian ‘Fundacao Getulio Vargas’ (FGV) në Sao Paulo.
Njerëzit në Amerikën Latine dhe gjetkë ‘e perceptojnë kërcënimin e kësaj lufte ndryshe nga ne në Evropë’, tha Baerbock. Qytetarët e zakonshëm në Brazil besojnë se çmimi i ‘orizit dhe fasuleve në supermarket këtë javë është më i rëndësishëm se ajo që ndodh në një vend që është 11,000 kilometra larg’, shtoi Baerbock.
Ajo më pas pohoi se ishte konflikti i vazhdueshëm midis Moskës dhe Kievit që ‘po rrit çmimet e ushqimit në mbarë botën’ dhe u kërkoi brazilianëve të ndihmonin për të bërë ‘çdo gjë që mundemi për të siguruar që më në fund të ketë paqe përsëri në Ukrainë’.
Presidenti i Brazilit, Luiz Inacio Lula da Silva, i cili mori detyrën në janar, ka bërë thirrje vazhdimisht për paqe mes Rusisë dhe Ukrainës. Ai ka këmbëngulur se dy kombet kanë nevojë për një ndërmjetës për të lehtësuar bisedimet e paqes.
Ai gjithashtu prezantoi një vizion të një ‘klubi paqeje’ ndërkombëtar që synon zgjidhjen e konfliktit gjatë takimit të tij me presidentin kinez Xi Jinping në mars.
