Autoritetet gjermane kanë nisur një hetim kundër Till Lindemann, udhëheqësit të grupit ikonik të rrokut ‘Rammstein’, i cili akuzohet për sulm seksual në turne.
Zyra e prokurorit publik në Berlin tha të mërkurën se Lindemann po hetohet për “shkelje seksuale dhe shpërndarje droge”. Deklarata erdhi disa orë pasi media të shumta gjermane raportuan se kundër këngëtarit kanë filluar procedurat ligjore.
Sipas Tagesspiegel, Lindemann u akuzua për shkelje të nenit 177 të Kodit Penal Gjerman, i cili mbulon sulmin seksual dhe përdhunimin.
Disa gra, disa prej tyre në mënyrë anonime, kohët e fundit pohuan se Lindemann i kishte detyruar të kryenin akte seksuale dhe i kishte sulmuar në koncerte. Ato gjithashtu thanë se ishin droguar.
Shelby Lynn, një fanse nga Irlanda e Veriut, i tha BBC-së se ajo, së bashku me disa gra të tjera, u përzgjodh dhe u shoqërua në prapaskenë për t’u takuar me Lindemann në një “festë para koncertit” në Lituani muajin e kaluar. Lynn tha se këngëtari reagoi me inat dhe u largua nga dhoma pasi kishte refuzuar të bënte seks me të.
Ekipi ligjor i Lindemann tha se “këto pretendime janë të pavërteta, pa përjashtim”. Avokatët premtuan se do të ndërmarrin “masa ligjore” kundër akuzuesve.
Rammstein lëshoi një deklaratë për fansat në fillim të këtij muaji, duke thënë se i mori akuzat për sulm “shumë seriozisht”. Grupi tha se ishte “e rëndësishme për të që tifozët të ndihen rehat dhe të sigurt gjatë shfaqjeve “.
I themeluar në vitin 1994, ‘Rammstein’ është i njohur për shfaqjet ekstravagante dhe sjelljen e zhurmshme në skenë. Disa nga videot e tyre muzikore shfaqin akte pornografike. Mediat gjermane raportuan javën e kaluar se grupi ishte në prag të shpërbërjes pas akuzave kundër drejtuesit të tij.
