Të ardhurat e ekonomisë shqiptare nga shërbimet e punës me porosi për subjektet e huaja shënuan rekord të ri në tremujorin e parë të këtij viti.
Të dhënat e Bankës së Shqipërisë tregojnë se të ardhurat neto të ekonomisë shqiptare nga fasoneria arritën në 196 milionë euro, niveli më i lartë i regjistruar ndonjëherë për një tremujor të vetëm.
Krahasuar me të njëjtën periudhë të vitit të kaluar, të ardhurat nga këto shërbime janë rritur me 24%.
Në terma neto, fasoneria ishte kontribuesi i dytë më i rëndësishëm në bilancin e llogarisë korrente të vendit, pas remitancave, duke lënë pas edhe prurjet neto nga turizmi.
Këto burime të prurjeve valutore kanë rëndësi të madhe për pozicionin e jashtëm të ekonomisë shqiptare, sepse mundësojnë ngushtimin e deficitit të madh në tregtinë e mallrave.
Krahu i lirë i punës ka qenë baza kryesore e mbështetjes së eksporteve shqiptare në 30 vitet e fundit. Fasoneria ka qenë e përqendruar historikisht tek prodhimi i veshjeve dhe këpucëve me porosi nga jashtë vendit.
Por, në vitet e fundit prodhimi me porosi po shtrihet gjithnjë e më shumë edhe në sektorë të tjerë të industrisë ushqimore apo pjesëve të këmbimit për automjetet dhe produkte të tjera industriale.
Ndryshe nga tekstilet dhe këpucët, aktivitetet e tjera të fasonerisë nuk janë të ndara në seksione statistikore të veçanta dhe kjo e bën të vështirë llogaritjen e kontributit të tyre në prodhim dhe punësim.
Megjithatë, vlerësohet se sidomos aktivitetet e lidhura veçanërsisht me industrinë automotive kanë fituar peshë të konsiderueshme në vitet e fundit. Lufta në Ukrainë dhe sanksionet ndaj Rusisë potencialisht vlerësohet se kanë shtuar shanset që tregjet si Shqipëria të fitojnë më shumë.
Megjithatë, tkurrja e popullsisë dhe vështirësia në rritje për të siguruar forcë pune të mjaftueshme po bëhet gjithnjë e më shumë një sfidë për perspektivat e sektorëve të fasonerisë.
Sipas të dhënave të Bankës së Shqipërisë, deficiti i llogarisë korrente pësoi një rënie të fortë në tremujorin e parë të vitit në 135 milionë euro, 72% më pak krahasuar me tremujorin e fundit të vitit të kaluar dhe 46% më pak krahasuar me të njëjtën periudhë të një viti më parë.
Kjo ishte njëkohësisht vlera më e ulët e shënuar ndonjëherë për tremujorin e parë të vitit, të paktën për periudhën prej vitit 2008 e në vazhdim, të mbuluar nga statistikat e Bankës së Shqipërisë.
Një nga faktorët kryesorë që ndikoi në uljen rekord të këtij deficiti ishte edhe sektori i fasonerisë. /E.Shehu
VINI RE: Artikulli është pronë intelektuale e Revista Monitor
