Të paktën 96 njerëz vdiqën në dy nga shtetet më të populluara të Indisë ditët e fundit, thanë zyrtarët të dielën, me një pjesë të vendit që është goditur nga një valë e madhe e të nxehtit.
Vdekjet ndodhën në shtetin verior të Uttar Pradesh dhe Bihar inlindor, ku autoritetet paralajmëruan banorët mbi 60 vjeç dhe të tjerë që vuanin nga sëmundje të ndryshme të qëndrojnë brenda gjatë ditës.
Të gjitha viktimat në Uttar Pradesh, gjithsej 54, u raportuan në rrethin Ballia, rreth 300 kilometra në juglindje të Lucknow, kryeqyteti i shtetit. Autoritetet zbuluan se shumica e atyre që vdiqën ishin mbi 60 vjeç dhe kishin probleme shëndetësore paraekzistuese, të cilat mund të jenë përkeqësuar nga nxehtësia e fortë.
Për shkak të gjendjes, autoritetet anuluan aplikimet për leje të personelit mjekësor në Ballia dhe siguruan shtretër shtesë në repartin e urgjencës për të përballuar ngarkesën e pacientëve.
Zyrtarët thanë se shumica e pacientëve të pranuar janë të moshës 60 vjeç e lart, duke shfaqur simptoma si temperature e lartë, të vjella, diarre, vështirësi në frymëmarrje dhe probleme të lidhura me zemrën.
Ballia, së bashku me Uttar Pradesh-in qendror dhe lindor, aktualisht po përballet me nxehtësinë shtypëse.
Të dielën, rrethi përjetoi një temperaturë maksimale prej 43 gradë Celsius, duke tejkaluar kufirin normal me pesë gradë. Lagështia relative u regjistrua në masën 25%, duke rritur efektin e vapës.
Në Biharin lindor, nxehtësia përvëluese ka përfshirë pjesën më të madhe të shtetit, duke çuar në 42 vdekje në dy ditët e fundit. Ndër viktimat, 35 ndodhën në dy spitale në kryeqytetin e shtetit Patna ku po trajtoheshin mbi 200 pacientë me diarre dhe të vjella.
Patna regjistroi një temperaturë maksimale prej 44.7 gradë Celsius të shtunën.
Muajt kryesorë të verës – prilli, maji dhe qershori – janë përgjithësisht më të nxehtët në pjesën më të madhe të Indisë, përpara se shirat e musonit të sjellin temperatura më të ftohta.
