Kompania shumëkombëshe amerikane e prodhimit të çipave Intel do derdhë 25 miliardë dollarë në një fabrikë të re në Izrael, sipas kryeministrit Benjamin Netanyahu, i cili tha se ndërmarrja shënon investimin më të madh ndërkombëtar të vendit.
Linja e re e prodhimit në qytetin izraelit Kiryat Gat pritet të hapet në vitin 2027, të funksionojë të paktën deri në vitin 2035 dhe të ofrojë vende pune për mijëra njerëz, tha Ministria e Financave, duke shtuar se, sipas marrëveshjes, Intel do paguajë 7.5 % normë tatimore, nga 5% tani.
Sipas Intel, kompania është bërë punëdhënësi dhe eksportuesi më i madh privat i Izraelit gjatë gati pesë dekadave të operacioneve të saj në vend. Korporata thuhet se është udhëheqëse e sektorit lokal të elektronikës dhe informacionit.
Intel bleu Mobileye Global me bazë në Izrael, e cila është e përqendruar në zhvillimin dhe vendosjen e sistemeve të përparuara të ndihmës për drejtuesit e mjeteve, për 15 miliardë dollarë në 2017.
Vitin e kaluar, gjiganti i teknologjisë amerikane e bëri publike Mobileye.Sipas Netanyahut, marrëveshja për objektin në Kiryat Gat është ‘një arritje e jashtëzakonshme për ekonominë izraelite – 90 miliardë shekelë – investimi më i madh ndonjëherë nga një kompani ndërkombëtare në Izrael’.
Operacionet e saj në Izrael kishin ‘luajtur një rol vendimtar’ në suksesin global të kompanisë, tha Intel në një deklaratë.
“Synimi ynë për të zgjeruar kapacitetin prodhues në Izrael drejtohet nga angazhimi ynë për të përmbushur nevojat e prodhimit të ardhshëm,” shtoi kompania.“Dhe ne vlerësojmë mbështetjen e vazhdueshme të qeverisë izraelite.”
