Presidenti Biden tha të mërkurën se presidenti rus Vladimir Putin po e humb ‘luftën në Irak’ teksa donte të thoshte Ukrainë – hera e dytë në rreth 12 orë që ngatërroi dy vendet e shkatërruara nga lufta.
Biden, 80 vjeç, është presidenti më i vjetër i SHBA-së dhe po kandidon për rizgjedhje vitin e ardhshëm, me mprehtësinë e tij mendore tashmë një çështje kryesore e fushatës, shkruan NY Post.
“Putini ka humbur qartë luftën në Irak. Ai po e humbet luftën në shtëpi dhe është bërë i pafuqishëm në mbarë botën”, u tha Biden gazetarëve në lëndinën e Shtëpisë së Bardhë teksa nisej për një udhëtim ditor në Çikago.
Të martën mbrëma, presidenti bëri saktësisht të njëjtin gabim ndërsa fliste në një mbledhje fondesh në Chevy Chase, Md.
“Mendoni për këtë,” tha Biden. “Nëse dikush do t’ju thoshte se ne do ishim në gjendje të bashkonim të gjithë Evropën në sulmin ndaj Irakut dhe ta bënim NATO-n të bashkohej plotësisht, unë mendoj se ata do t’ju kishin thënë se nuk ka gjasa.”
Gabimi u vu re në një transkript zyrtar të Shtëpisë së Bardhë të komenteve të Biden, me fjalën ‘Irak’ të kryqëzuar dhe ‘Ukrainë’ të shtuar në kllapa.
Biden do ishte 86 vjeç nëse përfundon një mandat të dytë në detyrë.
Kandidati aktual presidencial republikan është ish-presidenti Donald Trump, i cili do ishte 78 vjeç nëse fiton një mandat të dytë jo të njëpasnjëshëm dhe 82 vjeç pas largimit nga detyra.
