Skocia do kërkojë t’i bashkohet Bashkimit Evropian nëse siguron pavarësinë nga Mbretëria e Bashkuar, ka deklaruar në një intervistë kryeministri Humza Yousaf.
Vendi votoi për të qëndruar në radhët e Mbretërisë së Bashkuar në një referendum të vitit 2014, por, përballë realiteteve të Britanisë pas Brexit, skocezët kanë një energji të ripërtërirë për të ndërprerë lidhjet me Londrën dhe për të parë drejt Brukselit ndërsa Edinburgu lundron drejt së ardhmes së tij politike, tha Yousaf.
“62% e Skocisë votuan për të qëndruar brenda Bashkimit Evropian në vitin 2016”, tha Yousaf për Politico në komentet e publikuara të mërkurën.
“Por për fat të keq ne jemi nxjerrë nga BE-ja.”
Yousaf mori drejtimin e Partisë Kombëtare Skoceze (SNP) pas largimit të papritur të Nicola Sturgeon si kryeministre në fillim të këtij viti. Ai e ka bërë të qartë dëshirën e tij për të forcuar mbështetjen për një referendum të dytë të pavarësisë skoceze.
Ndërsa ka një oreks në mesin e shumë skocezëve për të mbajtur një votim të dytë për pavarësinë në më pak se një dekadë, çdo veprim për ta bërë këtë kërkon miratimin e Londrës e kjo nuk duket e afërt.
Vullneti politik për pavarësi nga Mbretëria e Bashkuar është ndërlikuar nga një hetim i policisë në financat e SNP-së, çoi në arrestimin e Sturgeon dhe bashkëshortin e saj Peter Murrell, një ish-drejtor ekzekutiv i partisë politike. Të dy u liruan pa akuzë, por hetimi në vazhdim ka kontribuar në një rënie prej dhjetë pikësh të mbështetjes për partinë.
