Demonstruesit thyen perimetrin e ambasadës suedeze në Bagdad të enjten, një ditë pasi një protestues dogji një kopje të Kuranit në Suedi.
Protestat në kryeqytetin irakian u urdhëruan nga kleriku i fuqishëm shiit irakian, Muqtada al-Sadr, i cili gjithashtu bëri thirrje për dëbimin e ambasadorit suedez në Bagdad.
Videot që qarkulluan në mediat sociale treguan disa protestues duke u ngjitur mbi një mur të barrikaduar jashtë ambasadës. Është e paqartë se sa larg arritën në ndërtesë, përpara se të tërhiqeshin.
Suedia tha se stafi i saj ishte i sigurt. “Ne jemi të informuar mirë për situatën. Stafi ynë i Ambasadës është i sigurt dhe Ministria e Punëve të Jashtme është në kontakt të rregullt me ta”, tha zyra e shtypit e Ministrisë së Jashtme suedeze për CNN në një email.
Protestat në Bagdad erdhën pas një incidenti në kryeqytetin suedez, Stokholm, të mërkurën, kur një burrë dogji një kopje të librit të shenjtë të Islamit jashtë një xhamie. Imazhet e ngjarjes treguan se ai ishte i vetmi person përveç përkthyesit të tij në demonstratë, e cila përkoi me festën myslimane të Kurban Bajramit, një nga më të rëndësishmet në kalendarin islamik.
Al Sadr u kërkoi autoriteteve të tërhiqnin kombësinë irakiane të Salwan Momika – organizatorit të protestës së Kuranit me një njeri në Stokholm – i cili emigroi për t’u larguar nga Iraku për në Suedi pesë vjet më parë.
“Nëse liria e fjalës i garantohet Irakut dhe botës, atëherë besimtarët duhet të shprehin pikëpamjet e tyre për djegien e librave të shenjtë… përmes protestave masive të zemëruara kundër ambasadës suedeze në Irak”, tha Al Sadr.
Vendet myslimane dhe organizatat islame kishin dënuar djegien e Kuranit në Stokholm. Irani e quajti aktin “provokues” dhe Kuvajti tha se ishte një “hap i rrezikshëm provokues”.
Organizata e Bashkëpunimit Islamik [OIC], Liga Arabe dhe Këshilli i Bashkëpunimit të Gjirit, të gjitha veçmas shprehën dënimin e fortë për ngjarjen.
Të mërkurën, Maroku tërhoqi ambasadorin e tij në Suedi dhe si Iraku ashtu edhe Arabia Saudite e dënuan ashpër aktin. Të enjten, Emiratet e Bashkuara Arabe thirrën ambasadorin e Suedisë në Abu Dhabi për të protestuar ndaj incidentit të djegies së Kuranit, tha agjencia shtetërore e lajmeve e Emirateve të Bashkuara Arabe WAM.
Në fillim të janarit të këtij viti, protestuesit irakianë u përleshën me forcat e sigurisë jashtë ambasadës suedeze për një incident të veçantë të djegies së Kuranit në Stokholm.
