Lulzim Basha ka vijuar sot fushatën për kreun e ri të Partisë Demokratike me takime në njësinë nr.2 në kryeqytet.
Në postimin e tij në rrjetet sociale, Basha shprehet se duke patur në fokus platformën për ndryshimin drejt së ardhmes, synohet që Partia Demokratike të jetë alternativa qeverisëse që shqiptarët meritojnë.
Basha nuk lë pa ripësëritur sërish pikat e tij për listat e hapura dhe vettingun e politikanëve, ku thotë se PD mund t’ sjellë këto ndryshime në bashkëpunim të ngushtë me qytetarët.
Postimi i plotë:
Fokusi i platformës tonë për ndryshim është tek e ardhmja, për t’u kthyer shqiptarëve besimin te vota dhe politika dhe për ta kthyer Partinë Demokratike në alternativën qeverisëse që shqiptarët meritojnë.
Ne do të përkushtojmë çdo energji në hapjen, vitalizimin dhe modernizimin e strukturave të Partisë Demokratike.
Sot ne kemi përgjegjësinë të japim një model tjetër në politikbërjen e vendit, që ka në fokus shpresat dhe ëndrrat e njerëzve, jo hallet e pak politikanëve.
Aleancë Qytetare për Demokracinë, do të jetë koalicioni ynë për të çliruar ekonominë dhe për të çuar përpara ndryshimet kushtetuese që do të zhbëjnë ato të 2008-ës, duke mundësuar:
Listat e hapura;
Vetting-un e politikanëve;
Votën e diasporës;
Kufizimin e mandateteve.
Partia Demokratike mund të sjellë këtë ndryshim, në bashkëpunim të ngushtë me qytetarët dhe partnerët tanë ndërkombëtarë, duke i dhënë çdo shqiptari fuqinë për të ndërtuar të ardhmen që meriton!
